Partido P.O.R den gobernacion lo reenforsa principio di bon gobernacion. Mirando e situacion cu ta tumando luga cu terenonan na Aruba ta di lamenta. Segun Andin Bikker di partido P.O.R, ta bisto cu e mandatario di infrastructura ta faltando respet pa principio di bon gobernacion. Na momento cu ta ehecuta principio di bon gobernacion ta trata di igualdad. No por ta asina cu partido P.O.R ta haya documento nan cu tin personanan hopi yega na e gobierno actual, ta haya tereno sin pasa ningun procedura di conseho di departamentonan. Esaki no ta den practica di principio di bon gobernacion, segun Bikker.
Principio di bon gobernacion ta exigi cu tur personanan na Aruba cu haci un peticion pa nan haya un tereno of un opcion riba un tereno nan mester haya trato igual. Na momento cu un persona no haya trato igual articulo 3. 40 di nos codigo civil ta bisa cu tur e contractonan aki ta nulo. E situacion aki ta inaceptabel y pa es motibo aki mes pueblo mester para keto y pensa bon un rato si e gobierno actual ta respeta principio di bon gobernacion.
Tambe tin varios reclamonan di ciudadanonan cu nan mester biba cu nan yiunan cera paden debi cu den nan bario a cuminsa establece diferente compania di cement y bloki den barionan cu ta destina pa vivienda, esaki ta un situacion cu e pueblo di Aruba ta disgusta di dje, debi cu nan no tin nan trankilidad mirando cu companianan di cement y bloki ta opera den nan bario nan mester tin nan cas constantemente cera pa nan yiunan no bira malo y alabes e airco ta keda cendi 24/7 y ta hala hopi coriente. Varios di e kehonan aki a yega na e gobierno actual unda cu e ciudadano a avisa di e construccionnan cu ta tumando luga sin permiso pero nada no a wordo haci y alabes e ciudadanonan mes a haya un impresion cu e gobernantenan actual ta pone man riba cabes di netamente di esunnan cu ta haci tipo di actividadnan di construccion den barionan habita sin tin un permiso. Segun Andin Bikker di partido P.O.R hopi di e ciudadanonan aki di nan propio forsa a bay corte pa busca proteccion di nan derechonan siendo cu ta gobierno ta esun prome yama pa reenforsa nos leynan y no trapa riba nan. Claramente por mira cu e gobierno actual no ta respetando principionan di bon gobernacion y ta opta pa bay contra di e pueblo y ta forsa e ciudadano bay corte pa asina mustra gobierno cu e ta canando e caminda robes.
Esaki ta e situacionnan cu un cantidad di ciudadano ta confronta nan mes cu ne debi cu gobierno ta haci y deshaci y trapa riba nos leynan cu e como gobierno mester respeta pa duna ehempel na pueblo. Parlamentario Andin Bikker ta kere cu e situacion aki ta un berguensa pa un mandatario cu no ta duna ehempel y no ta mantene su mes na principionan di bon gobernacion cu mester keda respeta pa tur gobernante. E realidad ta cu minister di infrastructura, prome minister di Aruba Mike Eman y Minister di Husticia ta fayando grandemente debi cu nan no ta respeta e principio di bon gobernacion.
P’esey ta importante pa pueblo di Aruba ta na altura di e situacionnan cu ta pasando y cu dia 22 di september abo por haci un cambio y stop tur fiesta cu ta tumando luga cu tereno di pueblo.
