Ayera mainta, minister di Husticia Andin Bikker a publica riba su pagina di Facebook cu a base di mediacion interno y den bienestar general, a restaura e relacion di trabou cu su colega minister di Infrastructura, Medio Ambiente y Desaroyo Teritorial, Marisol Lopez-Tromp.
Despues di algun incidentenan cu a sucede den seno di partido POR, e cual tambe a pidi pa minister Lopez-Tromp retira pa diferente motibo – por ehemplo, cu no por traha mas cune y tambe minister Bikker a sigura cu e no lo atende mas reunion di Ministeraad mientras cu Lopez-Tromp continua como minister – ayera mainta a keda conoci cu su decision a cambia.
El a afirma cu otro coleganan tambe ta dispuesto pa reanuda e relacion di trabou cu Lopez-Tromp, asina tambe e lo atende reunion di Ministeraad cu mester a tuma luga ayera, pero cu no a tuma luga mas.
Di otro banda, ayera den oranan di atardi a circula riba rednan social cu directiva di partido POR a entrega retiro y minister Bikker a dicidi di termina su carera politico. Den esaki Bon Dia Aruba a tuma contacto cu minister, pa locual el a duna como contesta e link di e post riba Facebook di Partido Por ‘E forsa Nobo’, na unda tabata splica cu nan ta den proceso di reorganisacion normal di directiva conforme statuutnan.
Door di retiro di ex-minister Otmar Oduber, ken tabata ex-voorzitter, nan a informa cu tin un miembro di directiva cu lo kier tuma su funcion. Pero pa via di diferente circunstancianan y crisis Covid-19 e proceso no a yega.
“Partido a pidi pa haci un estudio di e statuutnan pa por haya sa cua ta e stapnan necesario pa por yega na cambio di Directiva, segun e statuutnan. Pues ta un proceso interno cu ta andando y ta normal cu cada tanto tempo ta reeligi y reemplasa directiva di un organisacion”, e ta bisa den su post.
Asina como tambe a finalisa cu ta lamentabel cu pa via di medionan social ‘e proceso a haya su propio bida’.
