(AP) – Vice Presidente Kamala Harris a reuni riba diahuebs cu e CEO di Google, Microsoft y otro dos compania tocante desaroyo di inteligencia artificial mientras cu e administracion di Biden ta anunciando incentivonan cu e meta di sigura cu e tecnologia cu ta desaroyando rapidamente mehora e bida di e ciudadanonan sin cu pone nan derechonan y siguridad den riesgo.

President Joe Biden tambe a presenta na e reunion expresando su speransa cu e grupo lo “educa nos” riba loke ta mas necesario pa proteha y avansa sociedad. “Loke boso ta haciendo tin un potencial enorme y un peliger enorme,” Biden a bisa e CEOnan presente, segun un video publica riba su cuenta di Twitter.

E popularidad di e chatbot ChatGPT, cual te hasta Biden a purba caba, a causa un gran ola di inversion comercial den hermentnan di Inteligencia Artificial cu por skirbi texto convincente y crea imagennan nobo, musica y te hasta codigonan pa computer.

Na mesun luga, e facilidad cu e tin pa imita humanonan a causa cu gobiernonan rond di mundo ta considerando con esaki por kita trabaonan, gaña hende y plama mal informacion. E administracion democratico a anuncia un inversion di 140 miyon dollar pa establece 7 instituto di investigacion tocante inteligencia artificial nobo.

Ademas, e White House Office of Management and Budget ta premira di crea guianan den e siguiente lunanan di con e agencianan federal por haci uso di hermentnan di inteligencia artificial. Tambe tin un promesa independiente di desaroyadornan di inteligencia artificial pa participa den un evaluacion publico di nan sistema den augustus na e convencion di hacker DEF CON cu lo tuma luga na Las Vegas.

E Cas Blanco tin cu tuma accion mas fuerte mirando cu sistemanan di inteligencia artificial crea pa e companianan aki ta integrando den miles di aplicacion pa consumidor segun Adam Conner a splica. “Nos ta na un momento unda den e siguiente lunanan nos lo determina si nos ta lidera den esaki of otro partinan di mundo ta ldiera, di mesun manera cu otro espacionan regulatorio den tecnologia manera privacidad of regula plataformanan grandi online,” Conner a declara.

E reunion aki a tuma luga como un manera pa Harris y e oficialnan di administracion por trata e riesgonan den e desaroyo di inteligencia artificial actual cu CEO di Google Sundar Pichai, CEO di Microsoft Satya Nadella y e lidernan di dos agencia influencial pues Anthropic y OpenAI, e creador di ChatGPT.

Harris a bisa den un declaracion tocante e reunion cu a tuma luga tras porta sera cu el a bisa e ehecutivonan cu e “sector priva tin un responsabilidad legal, etico y moral pa sigura cu nan producto ta safe y proteha.”

ChatGPT a causa un ola di hermentnan nobo agregando na preocupacionnan etico y societal tocante sistemanan automatisa cu ta train a base di cantidadnan grandi di data. Algun compania, incluyendo OpenAI tin tempo siendo priva tocante e data cu nan sistema di inteligencia artificial su train ta basa riba dje.

Esaki a haci cu ta mas dificil pa compronde dicon e chatbotnan aki ta produci contestanan falso of cu preferencia y ta haci mas dificil ainda pa calma e preocupacionnan si esaki ta haci uso di trabaonan cu ta proteha pa derechonan di autor.