(AP) —E Departamento di Husticia a lanta caso contra Gobernador di Texas, Gregg Abbott, dialuna pa via di e baricada di boei instala riba Rio Grande. Esaki ta e tactico agresivo mas recien di parti Republicanonan pa purba stop migrante di crusa frontera pa Merca.
E demanda hudicial a puntra un hues federal na Austin pa forsa Texas pa kita un liña di baricada riba e riu, cual ta midi na 305 meter. Segun e administracion di Biden, esaki ta causa preocupacionnan humanitario y ambiental. E demanda ta bisa cu Texas a instala e baricada sin permiso entre e ciudadnan fronterisa di Eagle Pass y Piedras Negras, Mexico.
E baricadanan ta e ultimo escalacion di e operacion di seguridad riba frontera na Texas cu tambe ta inclui heki di waya, detencion di migrantenan riba carga di entrada ilegal y e transporte di buscadonan di asilo den ciudadnan Democratico pa otro estado. Critica a cuestiona e efectividad di e operacion, conoci como “Operation Lone Star.” Un testimonio di un soldaat di estado e luna aki a bisa cu e medidanan aki a laga algun migrante herida y a pone e mision bao critica intensivo.
Den anticipacion di e demanda, Abbott a manda e president un carta dialuna defendiendo e derecho di Texas pa instala e baricada. El a acusa Biden di pone migrantenan den riesgo por medio di no haci mas pa preveni nan pa drenta Merca.
“Texas lo mira bo den corte, Mr. President,” Abbott a skirbi. E administracion di Biden a bisa cu crusadanan na frontera ilegal a cay basta desde e restriccionnan di inmigracion a tuma efecto na mei. Na juni, e prome luna completo desde e politicanan nobo a tuma efecto, Proteccion di Frontera y Inmigracion Mericano a bisa cu encuentronan cu migrantenan a baha cu 30% desde e luna anterior y a yega na un di e nivelnan mas abao desde Biden su prome luna completo den oficina presidencial.
E Secretaria di Prensa pa e White House, Karine Jean-Pierre, a conta reporteronan cu e politicanan di Abbott en general a haci’e dificil pa agentenan di Patrulla di Frontera Mericano haya acceso pa Rio Grande. “Esey ta accionnan inhusto cu no ta yuda mes y ta balota kico e presidente a presenta y ta purba di haci,” el a bisa.
Den un carta siman pasa, e Departamento di Husticia a duna Texas te dialuna pa priminti pa kita e baricada of enfrenta un demanda. E carta a bisa cu e muraya di baricada “ta un riesgo pa nabegacion, como tambe pa seguridad publico, den Rio Grande, y ta presenta preocupacionnan humanitario.” E estado di Texas a desplega e boeinan sin notifica e Comision Internacional di Awa y Frontera of e Cuerpo di Ingeniero di Ehercito Mericano. E Secretaria di Estado di Mexico a puntra e gobierno federal pa interveni, bisando cu e baricada ta viola tratadonan internacional.
No ta prome biaha cu e administracion di Biden a lanta caso contra Texas pa via di su accionnan riba frontera. Na 2021, Abogado General Mericano, Merrick Garland, a acusa e estado di usurpa y hasta interveni cu e responsabilidad di gobierno federal pa enforsa leynan di inmigracion despues cu e Abbott a empodera mandatonan di soldaatnan di estado pa stop vehiculonan cargando migrantenan cu e motibo cu nan por aumenta e plamamento di Covid-19.
