Biden ta firma orden tocante criptomoneda mirando cu su uso ta explota

(AP) – President Joe Biden a firma riba diaranson un orden ehecutivo tocante gobierno su maneho di criptomoneda cu ta urgi e Reserva Federal explora si e banco central mester drenta den e uso y crea su mesun criptomoneda.

Secretario di Tesorado Janet Yellen a bisa cu e esfeurso lo promove un “sistema financiero mas husto, inclusivo y eficiente” mientras cu ta combati e financia illicito y preveni riesgonan pa stabilidad financiero y siguridad nacional.

E administracion Biden ta mira e explosion den e popularidad di criptomoneda como un oportunidad pa examina e riesgonan y beneficionan di bienes digital, un oficial di e administracion cu a revisa e orden diamars a bisa bao di e condicion di anonimidad. Bao di e orden ehecutivo, Biden tambe a pidi e Departamento di Tesorado y otro agencianan federal studia e impacto di criptomoneda riba e stabilidad finaciero y e siguridad nacional.

Brian Deese y Jake Sullivan, Biden su conseheronan di economia y siguridad nacional a bisa cu e orden ta establece e prome strategia pa bienes digital pa Merca. “Esaki lo yuda posiciona Merca pa sigui hunga un rol di liderazgo den innovacion y gobernacion di e ecosistema di bienes digital na cas y den stranhero, den un manera cu ta proteha e consumidor, ta consistente cu nos balornan democratico y ta avansa e posicion di Merca den e competencia global,” Deese y Sullivan a expresa den un declaracion conhunto.

E accion aki ta bini despues cu abogadonan y oficialnan di administracion ta expresando nan preocupacion cu Rusia ta usando criptomoneda pa evita e impacto di sancion imponi riba nan banco y industria di petrolio pa causa di e invasion di Ucrania.