(AP) – President Joe Biden a bisa diamars cu te ainda mester mira si Inteligencia Artificial (AI) ta peligroso, pero tambe a expresa cu e ta kere cu companianan di tecnologia mester sigura cu nan producto ta safe prome cu lansa esaki pa uso publico.
Biden a reuni cu su conseheronan di ciencia y tecnologia tocante e riesgonan y oportunidadnan cu avancenan rapido den inteligencia artificial por posee pa usuarionan individual y e siguridad nacional. “AI por yuda lidia cu algun desafio dificil manera malesa y cambio di clima, pero tambe esaki tin cu trata e riesgonan potencial na nos sociedad, economia y nos siguridad nacional,” Biden a conta e grupo, cual ta inclui tanto academiconan manera ehecutivonan di Microsoft y Google.
AI drenta den combersacion nacional y global den lunanan recien despues cu a lansa e popular ChatGPT, cual a yuda crea un careda entre gigantenan di tecnologia pa lansa hermentnan similar mientras ta aumenta tambe e preocupacionnan den sociedad y etica tocante tecnologia cu por genera un replica convincente cu ta mustra manera e ta trabao di un ser humano.
E Cas Blanco a splica cu e president democratico ta haciendo uso di e reunionnan aki tocante AI pa “trata e importancia di proteha e derechonan y siguridad pa asina por sigura innovacion responsabel y apropia” y tambe pa reitera su yamadonan na Congreso pa pasa legislacion pa proteha muchanan y coleccion di data di companianan di tecnologia.
Siman pasa Italia a temporariamente blokia ChatGPT pa causa di preocupacion cu privacidad y autoridadnan den Union Europeo tin tempo ta negocia aprobacion di reglanan nobo pa limita productonan di AI di riesgo halto den e bloke di 27 nacion.
Merca actualmente ta den un strategia diferente. E administracion di Biden aña pasa a revela un cantidad di meta cu e intencion di evita dañonan causa pa e lansamento di sistemanan di AI, incluyendo guianan tocante con pa proteha e data personal di usuarionan y limita e vigilancia riba nan.
