(AP) — Presidente Mericano, Joe Biden y e lidernan di Australia y Reino Uni ayera a anuncia cu Australia ta bay cumpra submarinonan di atake cu ta usa energia nuclear for di Merca pa modernisa su flota memey di preocupacion pa influencia di China den Indo-Pacifico.
Biden a bay San Diego pa presenta cu prome minister Australiano, Anthony Albanese y prome minister Britanico, Rishi Sunak mientras nan a elogia un asociacion nuclear di 18 luna cual a ricibi e acronimo AUKUS – pa Australia, United Kingdom y United States.
E asociacion, anuncia na 2021, ta permiti Australia haya acceso na submarinonan nuclear, cual ta mas silencioso y mas capaz cu submarinonan convencional, como un contrapeso na e refuerso militar di China.
Biden, mustrando sensitivo pa tensionnan cu China y critica riba e acuerdo, a insisti cu e submarinonan ta “usa energia nuclear, no tin arma nuclear.” Albanese a bisa cu e acuerdo ta “representa e inversion singular mas grandi den capacidad di defensa di Australia den henter nos historia.” Tambe ta e prome biaha den 65 aña cu Merca a comparti su tecnologia di propulsion nuclear, “y nos ta gradici bo pa esaki,” el a bisa.
Sunak a referi na AUKUS como “e asociacion multilateral di defensa mas significante den generacionnan.” El a bisa cu Reino Uni tambe ta bay comparti su 60 aña di experiencia manehando su propio flota submarino cu ingenieronan Australiano “pa asina nan por construi nan propio flota.”
Den un declaracion conhunto prome cu e anuncio formal, e lidernan a bisa cu nan paisnan a traha pa decadanan pa sostene paz, stabilidad y prosperidad rond mundo, incluyendo den Indo-Pacifico.
“Nos ta kere den un mundo cu ta protege libertad y ta respeta derechonan humano, estado di derecho, independencia di estadonan soberano y e orden internacional basa riba regla,” nan a bisa den e declaracion, publica prome cu nan presentacion conhunto na San Diego.
