(AP) — Presidente Mericano, Joe Biden a bisa ayera cu e tin intencion pa bishita e frontera entre Merca y Mexico – pa prome biaha desde cu a asumi su cargo – en conexion cu su reunion otro siman na Ciudad de Mexico cu lidernan Nort Americano.
“Esey ta mi intencion, nos ta preparando e detayenan awo”, Biden a bisa reporteronan durante un trip na Kentucky. E frontera en cuestion a mira aumentonan masivo den cantidad di migrante, hasta mientras ley di salubridad publico Mericano ta keda na vigor permitiendo autoridadnan Mericano rechasa hopi hende cu ta buscando asilo na Merca.
Lidernan Republicano a critica e presidente pa politicanan cu nan ta bisa ta inefectivo riba seguridad di frontera y a cuestiona pakico e no a bishita e lugar ainda.
Inmigracion ta bay ta entre e puntonan di combersacion mas importante na e cumbre dialuna y diamars, ora Biden y prome minister Canades, Justin Trudeau ta ricibi pa presidente Mexicano, Andres Manuel Lopez Obrador.
Pa awo, Corte Supremo a mantene na vigor restriccionnan di era di Trump, conoci como Titulo 42 den referencia na un ley di salubridad publico di 1944, despues cu Biden a actua pa caba cu nan y Republicanonan a demanda en respuesta. Titulo 42 tabata invoca pa preveni transmision di Covid-19, pero semper tabatin critica cu ex-presidente Donald Trump a usa e restriccionnan como pretexto pa cera e frontera.
Administracion di Biden ainda mester detaya cambionan sistematico pa maneha e aumento spera di migrantenan si e restriccionnan caba.
Biden a haci su comentario tocante e proximo bishita durante un parada na Kentucky na un brug cu ta ricibiendo dollarnan federal bao di e ley bipartisano di infrastructura.
