(Infobae) – Un mayoria di Peruano ta kere cu presidente Pedro Pablo Kuczynski mester bandona gobierno y su sucesor mester convoca eleccion, segun un sondeo diadomingo pasa, den un crisis politico cu ta rondona sr. Kuxzynski despues di e revelacion cu el a ricibi pago di e empresa Brasileño Odebrecht pa conseho.

Presidencia di Kuczynski ta colga na un hilo y lo dicidi riba su permanencia den poder diahuebs venidero, ora Congreso Nacional lo ricibi, sea e mes o su abogado pa scucha su defensa y despues vota riba un pedido multipartidario di declara e cargo ‘vacante’ pa ‘incapacidad moral.’

57% di esnan encuesta pa  e instituto Ipsos ta haya cu Kuczynski mester bandona e cargo, contra 41% cu ta señala cu e mandatario mester continua te final di su mandato di cinco aña, na juli 2021.

Sr. Kuczynski ta lucha pa sobrevivi desde cu Odebrecht a revela siman pasa cu a paga casi cinco miyon dollar pa yuda cu firmanan entre 2004 y 2013.

Di e total, 782.000 dollar a bay pa Westfield Capital, empresa di sr. Kuczynski, tempo cu e tabata  ministro di Economia y prome ministro di presidente Alejandro Toledo (2001-2006).

Otro 4,05 miyon a bay pa First Capital, empresa di un ex-socio. Den caso cu r. Kuczynski, di 79 aña di edad, bandona presidencia, 67% ta opina cu lo mester convoca eleccion general nobo (presidencial y parlamentario).

Apenas 30% ta pidi pa respeta e formula constitucional cu ta stipula cu e prome vice-presidente, Martín Vizcarra, mester asumi presidencia como su reemplasante pa e resto di e  periodo.

61% di e encuestadonan ta haya cu e mandatario debilita mester disolve congreso y convoca eleccion parlamentario nobo. E desaprobacion di maneho di sr. Kuczynski a subi te 75% na december, 10 punto mas cu e luna anterior, y e nivel mas halto desde cu el a drenta gobierno na juli 2016. Aprobacion a cay di 27% pa 18%, su punto mas abao. Ipsos a entrevista 1.287 persona, entre 13 y 15 di december pa e sondeo.

Sr. Kuczkynski su destino den congreso ta parce di ta defini caba, si e no logra convence su acusadonan diahuebs proximo. Pa destitucion (kitamento for di su funcion) di sr. Kuczynski ta rekeri 87 voto di e total di 130 asiento di parlamento, cu ta controla pa oposicion.

Diabierna pasa 93 congresista a aproba pa debati e mocion di destitucion. E partido di e dirigente opositor Keiko Fujimori, cu 72 representante di un total di 130, cu ta controla Congreso, a anuncia cu nan lo vota pa destitucion. E partido di gobierno Peruanos Por el Kambio tin solamente 17 representante.