Den e relato anual 2024 di su ministerionan, prome minister demisionario Evelyn Wever-Croes ta informa tocante e trabao, proyecto y/of servicionan realisa pa cada departamento cu ta resorta bou di dje. Den e relato anual por lesa tocante e proyectonan realisa, canando y esnan no realisa di Bureau Interne Dienst (BID).

E tarea principal di BID ta pa provee registracion di post y maneho di archivo pa gobierno. Ademas BID ta e organo oficial den seno di gobierno caminda tur corespondencia dirigi na ministernan ser entrega pa registracion. Cartanan saliente, Decretonan Nacional, Orden di Minister y contractnan tambe mester ser manda door di BID.

E relato anual di e ministerionan cu ta resorta bou di e prome minister ta trece dilanti proyecto y/of servicionan importante cu Bureau Interne Dienst (BID) a realisa cu exito. Un di e proyectonan aki ta e sistema nobo, AFAS Profit. E sistema aki a ser implementa cu exito pa monitoreo di credito y tambe pa e almacen central, cu a ser sosteni cu e lansamento di un portal pa cliente.

Aunke e sistema nobo a trece varios desafio, di otro banda e ta habri hopi oportunidad pa mehoracion. Pa por saca beneficio maximo for di e sistema, ta necesario pa haya formacion adicional, cual lo tuma luga den 2025.

Otro servicio cu a ser realisa cu exito ta e distribucion di PC nobo, red y central telefonico pa BID. Den 2024, un gran parti di e distribucion di PC nobo y su red pa BID a ser realisa, cual a inclui wifi, telefon digital y un configuracion LAN separa. Sinembargo, e relato ta indica, ainda tin algun desafio operativo.

Tambe a completa e proyecto piloto di balie digital y formularionan electronico, y un expansion adicional den e proyecto aki ta plania pa 2025. Durante e proyecto piloto, mas cu mitar di e peticionnan a ser atendi personalmente na BID of via telefon.

BID a finalisa tur fase di e proyecto website (DTP), for di sosten tecnico te sosten funcional, hunto cu input di DTP. E website a ser y ta activo.

Apart di e proyectonan cu a ser realisa, tin algun proyecto di BID cu no a keda realisa den 2024. Cursonan y formacion (nobo y repetitivo) pa personal ta un di nan. Esaki, segun informacion den e relato anual ta splica, tabata pa motibo di medio limita. Den 2024 solamente un curso a ser organisa pa casi henter personal di BID, cual tabata Comunicacion Escrito Profesional, duna pa Enseñansa pa Empleo.

Den 2023, a cuminsa e implementacion di Decos JOIN Cloud pa varios servicio den Ministerio di Transporte, Integridad, Naturalesa y Asuntonan di Adulto Mayor. Pa awor, e formulario electronico pa DTP y DSA-DLVV ta cla y prepara pa implementacion. E relato ta remarca cu esaki ta solamente un parti di e implementacion mas grandi pa tur servicio den ministerio.

Conseho di Minister a aproba pa pone e manehonan di Decos JOIN Cloud bou di Bureau Interne Diensten (BID), cu e meta pa pone e plataforma disponibel na nivel gubernamental. Esaki ta yuda directornan grandi pa traha mas eficiente, y tambe ta duna oportunidad na servicio chikito y departamentonan cu medio limita pa usa Decos JOIN na un costo mas abou. E plataforma lo pone archivonan digital, maneho di documento y trahando na forma di “zaken” mas accesibel pa tur servicio gubernamental.

Durante 2024, varios discusion a ser teni tocante e rapport di formacion cu DRH, TOPA y personal y coleganan di BID. E rapport aki ta fundamental pa e restructuracion y fortalecemento di BID. Segun e relato anual ta señala e rapport ta den su fase final.

BID tambe ta encarga cu e Servicio Central di Entrega (Bodedienst). E relato anual ta indica cu e plan original tabata pa haci un encuesta y tuma contacto cu e servicio cu actualmente no ta usa e bodedienst di BID. Pa motibo di varios factor, e preparacion a ser retrasa. Den esaki BID ta pone su atencion riba continuacion di e proyecto den 2025, cu meta di amplia e ofertanan y mehora e eficiencia di e fluho di corespondencia interno y externo.

Den 2024, BID a traha riba optimalisacion di procesonan operacional y implementacion exitoso di iniciativanan nobo, door di yuda varios servicio gubernamental, incluyendo:
SvA, Ministerraad, Bureaunan di Ministro, DIMAS, DAO, DSZ, DTI, DPL, DIP, KIA, CENSO, RVM, DTP, DSA, BCI, ARA, DEZHI, DNM, DIA, CAD, DPS, SVA, DLV, DLVV, IVG, DOW, DRH, OM, VDA, DBSB y BID.

Apoyo specifico a ser duna na DAO, DTP, DTI, VDA y OM den implementacion y mehoracion di DMS-Join. Esaki ta keda un parti esencial di e trabounan di BID, cu meta pa logra fluho di documentonan mas eficiente y un miho accesibilidad digital pa e gobierno.

E training y guia na luga di trabou pa usa e portal di clientenan a keda realisa cu exito. BID ta sigui brinda apoyo na e servicio cu preguntanan y notificacion, y den general, e sistema ta ser evalua positivamente.

BID tambe tin proyectonan cu a cuminsa, pero cu no a finalisa y cu lo mester keda core den aña 2025. E proyectonan aki ta inclui: digitalisacion di dossiernanan di personal (VDA y BID) cu a cuminsa den 2024 y lo sigui su implementacion den 2025; procesonan (formularionan digital y sistema di caso) cu ta trata e procesonan pa DTI, DAO, DSA y DTP cu a cuminsa caba y lo sigui su desaroyo den 2025.

Mas di e proyectonan aki ta e implementacion di iBabs den RvM cu tin como meta mehora e proceso di tumamento di decision y a cuminsa den 2024 y lo sigui den 2025; digitalisacion y reemplaso di documentonan di archivo (BID/DEZHI) den cual 300 dossier a ser digitalisa, pero e copianan a ser ricibi den hopi mal estado. Tin ainda 10 mil dossier pa digitalisa. E progreso di e proyecto aki ta mas slow di loke a spera pa motibo di e estado fragil di hopi documento. Esaki ta un proyecto andando.

Por ultimo, den 2024 e proyecto di reproductividad a bay mas eficiente, pasobra scol y fundacionnan a manda nan peticionnan pa copia mas trempan y den cantidad mas chikito cu e aña anterior. Esaki a evita oranan extra y a haci posibel pa entrega tur copia na tempo pa comienso di aña escolar. BID ta traha hunto cu minister di Enseñansa y DPS pa optimalisa e sistema pa fundacionnan.