Green Education Symposium ta hayando anualmente mas acogida. E aña aki tabata e di 6 version di e evento aki caminda Biblioteca Nacional Aruba (BNA) a dedica henter un siman (4-8 september) pa organisa un agenda di actividad atractivo pa e muchanan y hobennan di scol, pero tambe pa adultonan.

Directora di BNA, Astrid Britten a expresa su satisfaccion riba e manera con e simposio aki a bay. “E tabata un evaluacion hopi exitoso”, el a bisa. E participacion tabata grandi di diferente scol secundario cu a mustra un gran interes.

E ta reconoce cu ta dificil pa haya e atencion di e muchanan, specialmente rond un topico cu por resulta complica pa nan. Sinembargo e bibliotecanan tin retonan riba nan mes con nan por bin cu programanan pa hala atencion di e muchanan y hobennan, ya cu nan ta e grupo meta pa e bibliotecanan den Caribe y na Merca tambe. E grupo aki por ta un poco dificil pa traha cu ne.

E biaha aki nan a pone atencion special riba e topico di cambio climatico, cambio den alimentacion y agricultura. “Bo tin cambio climatico, pero na mesun tempo e cambionan ta bin riba e parti di cuminda y e parti di agricultura tambe”, e directora a bisa.

E echo cu nan por trata e topico aki di un forma otro, ta haci cu e simia di conscientisacion y esun di sostenibilidad sigur lo duna su fruta cerca nan. Segun directora di BNA bo por mira movecion den e direccion aki.

“Si nos mira un tanto aña pasa no tabatin nada, pero aworaki e consenshi t’ey”, el a bisa. E ta considera e proceso aki ainda un comienso; hopi mas mester sosode manera e prohibicion di saco di plastic cu e ta haya un bon iniciativa.

Educacion berde
Ronny Alders kende ta e coordinador di e proyecto aki durante 6 aña consecutivo (2012-2017), a bisa cu e version di e aña aki a nifica cu tin mas charla, exposicion, tayer, etc.. Nan tin intencion pa bin cu un “green corner” of un “huki berde” na Papiamento crioyo, unda e hobennan pero tambe publico en general, turistanan y studiantenan cu ta studia afo ora cu nan ta bin bek Aruba,por haya informacion pa nan studio y haci investigacion via nan data base pa medio di nan centro di informacion digital (CID).

Tambe como proyecto pa futuro nan kier bin cu bukinan di green education y nan kier bin cu un mata artificial den biblioteca unda e muchanan por lesa nan bukinan. E idea ta pa haci nos biblioteca tambe mas visual na un forma green. “No solamente duna informacion, pero dado momento publico kier wak kico biblioteca tin na green”, sr. Alders a bisa.

E idea tras di e simposio aki ta pa nos hobennan sa cu Aruba tin condicion natural manera biento, solo, lama, etc., ‘cu ta bendicion di Dios y cu nos mester saca probecho di dje’. Tambe nan por haya interes pa studia afo e parti di sostenibilidad, ya cu varios pais rond mundo tin sostenibilidad den nan curriculum.

Arte y alimento sostenibel
Durante e simposio tabata tin un grupo di oradonan invita tanto di afo como local; nan ta: David Bynoe (Barbados), Wiliiam Michaels Guerrero (Colombia), Kristen Mastel (Merca), Frank Kelly (Aruba), James Ocalia (Aruba) y Andre Marin (Aruba).

Michaels Guerrero a wordo invita no solamente como orador sino como artista, ya cu e ta haci uzo di tecnica di material recicla pa traha su artenan. El a haci tayernan pa e muchanan di scol, cual segun comentario a cay den bon tera. Na final a pone un exposicion di e obranan cu e mesun studiantenan a traha.

Sr. Alders ta haya cu e aporte di e artista aki tabata un adkisicion grandi pa loke simposio aki ta busca, tumando na cuenta cu a incorpora e parti di reciclahe of miho bisa un tipo di arte sostenibel den e simposio. Sra. Mastel ta un bibliotecaria kende tambe a mustra riba e atencion cu mester tin riba tereno di sostenibilidad.

Bishita Cas Speransa Nobo
Un actividad interesante cu tambe a tuma luga, ta e bishita di e agricultor David Bynoe, cu ta haciendo su Phd riba parti di sostenibilidad,na e organisacion Cas Speransa Nobo. Akinan a integra e parti social den henter simposio, ya cu Cas Speransa Nobo ta uza trabou di agricultura como un forma di terapia pa nan clientenan rehabilita.

Durante un anochi di lectura, Cas Speransa Nobo a bin ofrece su productonan manera concomber, bonchi largo, yambo, pues un variedad di cuminda di cunucu. E tabata un actividad masha interactivo.

E presentacion di Andres Marin hunto cu Byor Lampe, kendenan a bin cu e parti alternativo di cuminda, a hala atencion. Nan ta purba di siña hende come insecto manera criki. “Nan a haci mas cu e criki, te hasta kroket di criki”, sra. Britten a bisa.

Sra. Britten a haya cu e version aki tabatin su innovacion y tur esaki ta cambionan cu ta tumando luga na Aruba mes. E hendenan aki tin un plantacion sostenibel y criadero di criki na Catiri unda nan ta experimenta mas y mas.

E ta haya cu como biblioteca nan mester keda duna informacion pa duna importancia riba un tema asina. Netamente pa medio di duna e tipo di informacion aki nan ta yega na e studiantenan pa logra un bon causa.

Cambio den agricultura y alimentacion
E asunto di cambio den agricultura y alimentacion a hala hopi atencion durante e “Evening of Lectures”, specialmente e asunto di consumo di criki. “Nan a mira esaki manera algo straño y totalmente diferente”, el a bisa. E evento aki tabata un lectura pa publico general cu a bay di un forma diferente. Frank Kelly a bin cu un variedad di producto cu e ta traha fei naturalesa, ya sea a base di flor, y te hasta kroket di cadushi

Na final, directora di BNA ta haya cu e muchanan na dado momento lo por implementa e informacion cu nan a haya durante e simposio aki of a lo menos por cuminsa cu cosnan chikito. Riba tereno di sostenibilidad e ta kere cu no tin nada mas apropia cu cuminsa cu nos hobennan, ya cu nan ta bay cas hopi entusiasma y nan ta envolve e mayornan tambe.

El a expresa cu tur esaki no tabata posibel sin nan sponsor WEB Aruba N.V. cu a mira e importancia di un tipo di evento manera esaki.