Dedica na e islanan ruman, Aruba, Boneiro y Corsou (ABC), otro siman ta bay tuma luga e Encuentro Internacional Literario, Cultural y Linguistico na Biblioteca Nacional, unda ta bay tin invitadonan cu ta bay duna presentacion y charla, cu baile, canto y musica.

Diahuebs 1 di juni for di 6:00 pm pa 9:00 pm den cooperacion cu Biblioteca Nacional Aruba, Departamento di Cultura Aruba y Mirto Laclé lo presenta un programa multidisciplinario cu enfoke riba dicho y proverbio ‘Sabiduria Popular ta di nos tur’ cu charla, canto, baile, declamacion, musica, cultura y educacion en general cu ta bay tuma luga na Biblioteca mes.

Como invitado special y orador ta bay tin Domingo “Wini” Paulo for di Corsou, cu ta bay presenta su buki nobo di proverbio y dicho na Papiamentu, Biba Palabra. Den un conferencia di prensa di ayera, Mirto Laclé a expresa cu den pasado Wini a yega di presenta su bukinan den cual tin e formanan con hende tabata expresa antes, y Laclé mes ta bay duna un recorido historico di origen di proverbio for di Africa te Caribe y Caribe Hulandes.

Como invitado special for di Boneiro ta bay tin e historiador Boi Antoin, ken ta bay presenta un charla encuanto ‘Diferencia y Similaridad entre palabranan na Papiamentu/o di e islanan ABC’ y tambe di ‘Beinamen specifiko di Boneiru’.

Tambe ta bay ta presente Grupo di Baile Mardi Gras for di Corsou, bao direccion di Jacqueline Nicia y Rudmila Alexander, kendenan ta bay deleita publico cu algun baile, entre otro di caha di orgel pero tambe nan ta bay den un son montuno cu salsa y un tumba.

Glenda Tromp-Geerman ta bay duna un cordial bonbini na publico presente cu su caha di orgel di su mesun produccion, yama ‘Desiree,’ cu dos tocado di wiri, “pa bay back den tempo, pa wak con hendenan antes tabata deleita,” Laclé a sigura.

Cantante Antonieta Ras-Booi ta bay entretene cu algun cancion.

Munye Oduber-Winklaar ta bay recita algun poema relaciona cu Conmemoracion 160 aña Abolicion di Sclavitud, como por ehemplo “Grito.”

E buki nobo di proverbio di Wini Paulo Biba Palabra, ta bay ta obtenibel.

Ademas, Laclé a señala cu esaki ta bay ta un programa pa hendenan di Aruba por disfruta y pa mustra e hermandad cu pa medio di proverbio cu a yega di diferente luga y influencia indigena cu Aruba tin pero tambe di Africanonan cu a traves di proverbionan por mustra con nan tabata duna enseñansa.

Entrada pa e anochi aki ta gratis. Pa mas informacion por tuma contacto cu Mirto Laclé, cel. 742-6274.