Departamento di Cultura Aruba hunto cu gestor cultural Mirto Laclé, ta bay presenta un programa pa celebra e multiculturalidad y multilingualidad na unda ta bay haci un homenahe na e autor y poeta Frida Winklaar-Domacassé.
Pa diaranson 29 di mei for di 6.30pm pa 9.00pm ta bay tuma luga un otro Encuentro Literario-Cultural na Biblioteca Nacional Aruba ubica George Madurostraat, Oranjestad caminda ta bay tin un anochi hopi special cu un programa presenta pa Biblioteca Nacional Aruba, Departamento di Cultura Aruba hunto cu gestor cultural Mirto Laclé unda ta bay presenta un programa pa celebra e multiculturalidad y multilingualidad di isla Aruba.
Durante e programa ta bay enfoca riba e diferente disciplina, entre otro, Literatura, Arte, Cultura, Linguistica y Educacion en general, tambe ta bay tin presentacion di charla, musica, canto, baile, declamacion y exposicion.
Como huesped for di Hulanda lo ta presente e autor y poeta Frida Winklaar-Domacassé, Steve Francees, artista pintor di Aruba, ken ta bay duna un presentacion y tambe ta bay tin agasaho musical di e banda Ash & Friends, ademas e grupo di baile Club di Movemento cu ta bay ta presente pa deleita cu algun baile.
Den esaki, e autor y poeta Frida Winklaar-Domacassé, ta bay ricibi un homenahe pa su obra literario, Frida ta miembro di e organisacion artistico Simia Literario na Hulanda. Ademas ta bay tin atencion special pa Adinkra, e ultimo obra literario di Frida Winklaar, e cual ta trata di un edicion special den cuadro di Conmemoracion di Pasado y Herencia di Sclavitud 2023.
Recientemente a presenta e buki Adrinkra na Hulanda y awor Aruba tin e honor pa presenta e ultimo obra di Frida Winklaar-Domacassé, Adinkra ta simbolonan cu nan raisnan na Ghana y Costa Marfil tin nan propio nificacion y mescos cu proverbio ta expresa sabiduria di bida.
Steve Francees lo duna un presentacion di algun di su pinturanan dedica na Aruba y Boneiro, pero tambe na pintura/cuadro relaciona cu e tema di Conmemoracion 160 aña di Sclavitud.
Grupo di baile Club di Movemento ta bay demostra algun baile y nan ta bou guia di Samantha Westera-Juppa den cooperacion cu Vivian Maduro-Crespo.
Tambe ta bay tin actuacion di diferente artista cu lo duna nan presentacion den canto y declamacion, manera Karina Maduro, Ariana Koolman- Chirino, Aurelia Croes y John-Freddy Montoya.
E banda musical Ash & Friends, ta consisti di e musiconan Ash, Shurby, Vio y Chicho ken ta bay ta presente y lo deleita publico cu musica bailabel Latino-Caribense.
