Ayera Biblioteca Nacional Aruba a anuncia cu miembresia di 0 pa 18 aña a bira gratis y nan ta espera duna un bonbini na tur esnan cu no ta miembro ainda pa haci uso di oportunidad aki pa asina bira miembro sin ningun costo.
Astrid Britten, director di Biblioteca Nacional Aruba, a informa cu pa hopi aña nan ta motiva tur persona pa lesa, cual ta un punto importante di un maneho di e Biblioteca mes cu ta e lesamento.
Tambe nan a introduci den cuadro di esaki programanan y un di nan ta e Festival di Buki pa Mucha cu aña pasa nan a para keto na e di 30 edicion di e festival aki.
Ora un persona bira miembro e tin su beneficio, na unda Britten a splica cu e ta duna na un mucha of hoben un coleccion grandi cu nan por haci uso di dje “nos tin materialnan na papiamento, Hulandes, Spaño, Ingles y un coleccion chikito di Frances, nos ta ofrece acceso directo di Internet y loke nos ta yama Free Wifi cu despues di oranan di scol akiden ta bon concuri y hopi mucha ta bini pa haci uso di e facilidadnan aki. Mas y mas tambe ta rekeri cu mester traha den grupo, dus no tin un luga mas ideal pa t’ey na Biblioteca naturalmente.”
Igualmente e persona lo tin acceso na E-Books caminda nan tin un acuerdo cu Hulanda y e persona lo haya un codigo di miembro pa e por haci uso di e contenido cu tin disponibel y ademas nan tin cantidad di buki digital como tambe audio books.
“Na dado momento por ta bo tin problema cu bista of bo ta prefera di scucha lo cual cu ta bisa en bes di lesa, esey tambe ta posibel”, Britten a sigura.
Britten a trece dilanti cu nan buki ta diverso pa motibo cu Biblioteca ta pa tur hende cu acceso liber sin distincion y nan tin un coleccion cu ta inspira hendenan, e topiconan tambe ta varios, “manera nos ta bisa, ban yega na Biblioteca cu ta un espacio unda bo por lesa, studia of simplemente si bo kier yega na Biblioteca y actualmente nan ta bezig ta haci e renobacion necesario y dentro di poco nos lo tin Lease Cafe.”
E iniciativa di miembresia gratis a cuminsa na Hulanda cu a introduci desde juni di aña pasa pa comunidad di Hulanda tin un miembresia gratis y como parti di Reino e islanan BES, Aruba, Corsou y Sint Maarten pa ta parti di esaki.
