Awe pa prome biaha, Biblioteca Nacional Aruba su sede principal na Playa ta funciona como un stembureau den eleccion aki. E ta e di seis stembureau cu ta wordo habri for di 8’or di mainta pa 7or anochi den e stemdistrict di Oranjestad.
Den e stembureau di Biblioteca Nacional Aruba (BNA) un total di 1.106 votado por haci uzo di nan derecho di voto den eleccion parlamentario aki, caminda 70.749 ciudadano ta apto pa participa den dje.
Director di BNA, Astrid Britten ta declara na Bon Dia Aruba cu den eleccion aki, nan ta fungi como stembureau number 23 pa e area di Oranjestad. El a splica cu mirando cu dos localidad cu ta Juliana Scol y Beatrix Scol ta cera pa motibo di trabou di renobacion, BNA a bira un stembureau pa eleccion di awe.
Segun sra. Britten esaki ta un acontecimento nobo pa BNA su historia moderno. Ya cu pa prome biaha, nan ta haya nan mes pa atende cu e asunto aki como departamento di gobierno den cuadro di e actividad democratico di awe. Como biblioteca nan ta maneha como fecha oficial di existencia 20 di augustus 1949, kiermen cu aki dos aña nan ta celebra 70 aña di trabou di bibliotheek na Aruba. Aunke nan ta mira e fecha aki como esun oficial, pero e trabou di bibliotheek a cuminsa mas prome cu esey, ya cu pa motibo di documentonan historico nan ta asumi esey.
