Actualmente tin 19 hende den cuarentena y ainda tin 2 caso di COVID-19 activo na Saba, asina gobernador di e isla Jonathan Johnson a bisa diamars den e update di coronavirus.
Mientras e casonan ta keda aumenta na e otro islanan, specialmente Aruba y considerando cu Boneiro y Corsou a habri frontera pa Aruba durante e simannan cu a pasa, e riesgo pa e islanan aki a cambia pa medium. Pa e mesun motibo aki e protocolnan di biahe pa persona di Boneiro y Corsou tambe a cambia. Esaki kiermen cu e biahenan di placer pa e islanan aki ya no ta permiti y e procedimento di cuarentena mester wordo sigui pa tur biahero esencial cu ta bin di e islanan ey.
No ta requeri cuarentena pa pacientenan di e oficina di Seguro di Salud ZVK regresando for di Boneiro y Corsou si a biaha bao di protocol estricto di ZVK. Tur biahero cu ta yega di pais cu riesgo halto, manera Merca y St.Maarten, ta requeri di bay den sitio di cuarentena central na Saba. E biahero lo ta responsabel pa tur compra y entrega den e localidad aki, tambe pagando pa por keda eynan .
Saba actualmente ta den alerta number 2, y lo mantene esaki asina pa 2 siman adicional, si no sucede otro tipo di desaroyo, Johnson a bisa.Pa haci un biahe na e momento aki ta algo no recomendabel. “Nos kier informa cada persona cu lo desea di bishita e isla pa cosnan no esencial, pa por fabor tene esaki na cuenta,” el a bisa.
Organisacion di biahe di regreso, como tambe cualkier costo adicional cu por surgi, lo ta responsabilidad di e biahero mes, Johnson a informa. E politica di biahe ta cu biaheronan medico o esencial, studiante y residente so lo por drenta Saba. Tur persona cu ta desea di haci esaki mester prome manda un email pa info@sabagov.nl pa asina por solicita permiso di entrada. Si aproba e solitud e persona lo haya un carta di exencion, cual ta nesecario y ta describi e condicionnan cu mester sigui; persona cu no tin carta no lo wordo permiti drenta Saba.
