Hende biahando cu paspoort Hulandes mester di un visa pa por bishita Merca si anteriormente a bishita Cuba. Esaki a keda reitera pa Departamento di Asuntonan Exterior di Aruba, DBB.
E departamento a ricibi diferente melding di biaheronan cu tabatin e asina-yama ESTA, e sistema electronico di Merca cu ta duna acceso na e pais, segun e portal noticiero aruba.nu ta reporta. Sinembargo, esaki a keda anula pa Aduana y proteccion di frontera di Merca asina cu ta nota cu tin un stempel di Cuba riba e paspoort.
“Si bo kier biaha pa Merca y bo a bishita Cuba, bo no ta permiti pa haya un documento ESTA. Bo lo mester bay na bo embahada of consulado Mericano mas cercano y aplica pa un Visa B2,” segun website visagov.com. “Pa haya e Visa B2, bo mester yena e documento DS-160 pa personanan entre 13 pa 79 aña di edad y haci un entrevista na e consulado Mericano na bo pais.”
“Gobierno Mericano ta considera Cuba como un estado patrocinador di Terorismo (SST). Esaki ta nifica cu si bo a biaha na Cuba for di dia 12 di januari 2021, bo mester di un visa. E unico cambio real ta cu bo lo mester planea bo trip pa Cuba cu mas tempo cu ora bo aplica pa e ESTA. E tempo pa procesamento ta mas largo si mester bay e embahada y sinta pa un entrevista,” segun e website. “Bo mester considera cu si bo tin un ESTA valido y a biaha pa Cuba despues di 12 di januari 2021, e ESTA no lo ser cancela. Sinembargo, no por renoba esaki despues cu e caduca, y e persona mester aplica pa un visa di turista.”
E website ta indica cu e rekisitonan aki tambe ta aplica na momento di biaha pa Iran, Irak, Libia, Nort Korea, Somalia, Sudan, Siria of Yemen desde dia prome di maart 2011.
E cambionan aki no ta conta solamente pa paspoort Hulandes sino tambe pa tur nacionalidad dentro di Union Europeo.
