Asina a declara Sharline Koolman di Departamento di Salud Publico (DVG) durante un conferencia di prensa dialuna ultimo, den cual el a splica cu si kier bay cu vakantie y ta algo no di trabou, lo ta miho pa hala e fecha di biahe.
Ademas el a resalta cu na momento cu e personanan lo biaha, mester check kico ta e rekisitonan cu mester, no solamente di Covid-19 sino di otro vacuna, y ki otro tipo di cosnan mester tene na cuenta. Pero si no ta necesario, djis no biaha.
Pa loke ta trata seguro di biahe, mescos cu a wordo implementa na Aruba ta conta pa otro pais. Si e persona ta biahando pa trabou, of si mester bishita un hende den exterior, e persona mes tin cu check cu seguro di biahe si esaki ta cubri Covid-19 of no.
Di mesun manera, Koolman a trece dilanti cu si ta wak cu tin mas casonan importa, pero tambe e casonan local ta birando mas, por bin cu medidanan relaciona cu distanciamento social, incluso otro lockdown si ta necesario.
Tambe a destaca 8 indicador cu lo usa pa midi nan capacidad. Koolman a bisa cu esaki ta pa tuma conseho of eleva e medidanan. El a splica cu ta un sistema di luz di trafico, cu na momento cu e ta cambia di berde pa cora, mester aumenta e medidanan. E color indicado ta relaciona na e capacidad pa cada un, cu lo midi separadamente y continuamente, caminda ta haci un prueba. Ademas el a comenta cu a base di esey lo duna conseho na ki ora mester interveni y ki medida mester implementa.
Tanten cu e color ta na berde, esey ta nifica cu e situacion ‘ta bon’. Si ta yega na color shinishi ta e momento pa tuma algun medida; den color geel ta nifica cu ta cerca di cora y e situacion a bay hopi leu caba y mester bin cu medidanan mas drastico. Ta ocho indicador cu nan ta evalua constantemente. Den principio nan a papia di cada dos siman, pero mirando di na unda e turistanan lo bin, nan lo por controla esey miho.
