(AP) – Miles di fanatico a presenta na e capital di Suecia Stockholm pa celebra e apertura di Beyoncé su tour mundial nobo diaranson.
“Renaissance” ta e gran celebridad su prome tour como solista desde 2016 y ta comparti e mesun nombre cu su album lansa den 2022, e exito cual a pone Beyoncé riba e trono di Grammy como e ceremonia su artista mas decora y honra den historia.
Fanaticonan cu a keha den lunanan recien pa un falta di videonan musical pa e hitnan di “Renaissance” a haya un regalo diaranson ora cu videonan y animacionnan a keda pasa riba escenario central. E sucesion di cambio di costume rapido y cambio di decoracion tabata asombrante. E cantante a presenta cu interaccion entre un mundo digital y fisico unda dispositivonan robotico a haci espacio pa varios diferente decoracion.
Apesar di e escala impresionante di e escenario, algun momentonan a sinti intimo entre e cantante y su fanaticonan. El a expresa un gratitud genuino na su fanaticonan cu a biaha for di leu pa mira su concierto. El a canta canticanan cu ta den un rango amplio den su carera di 2 decada, cuminsando e show cu “Dangerously in Love,” cual ta e cancion titular di su prome album como solista, despues cuminsando e himno di empoderacion “Run the World (Girls)” y siguiendo e concierto cu un gran seleccion di hit di e album recien “Renaissance.”
Diaranson su show a bende tur e 46,000 ticket cu tabata disponibel y si e audiencia su reaccion a duna un bista di con e resto di e tour lo ta, e ta pinta un imagen cu esaki lo ta un hit. Beyoncé lo stop na mas di 40 ciudad incluyendo London, Paris, Barcelona y Toronto prome cu e clausura di e tour dia 27 di september na New Orleans.
