Beth Tromp: ‘Cultura di Testigo di Jehova ta sconde abuso di mucha’

Nos sa mira nan riba caya den areanan hopi transita, cu foyeto di informacion, amablemente cumindando e peaton. Algun di nos a yega di ricibi nan bishita na cas, bijbel den man, pa papia tocante religion. Sinembargo, tiki di nos sa e realidad cu Testigo di Jehova ta biba tras di porta cera. Bon Dia Aruba a combersa cu Beth Tromp, kende a conta nos di su experiencia prome y despues di bandona e grupo.

Beth a conta cu e manera con e institucion ta hinca den otro ta crea un ambiente di abuso, miedo y silencio. “Mi a crece den miedo y stress, cu tiki diversion aki aya.” El a splica cu el a crece keriendo cu tur hende den e grupo ta bo amigo, ruman, wela. “E no ta un iglesia, e ta un famia.” El a crece confiando den miembronan di e grupo, bayendo den auto cu nan, keda cerca nan na cas, su so. Den su congregacion, mayoria di e ‘rumannan’ tabata hende grandi. “Bo ta wordo entrena pa acepta autoridad.”

Creciendo den e grupo di chikito, e ta conta nos con tur decision y creencia ta basa riba e publicacion di Watch Tower. El a bisa cu tin hopi contradiccion den e educacion di Testigo di Jehova. “Bo ta wordo bisa cu bo ta e nacion scogi di Dios, pero na mes momento, bo ta imperfecto, no digno. Pa mi esaki a crea hopi confusion, y mi a lucha pa reconcilia esaki.”

E contradiccion den e grupo a bira mas aparente mientras Beth tabata crece. “Mi a mira con e muchanan cu tabata reporta abuso tabata wordo cualifica di ‘busca atencion’ y ‘problematico’.” Esaki a haci cu ora e mes a pasa den un situacion dificil, el a sinti cu e no por a acudi na niun hende pa ayudo. “Tin un mensahe den e publicacion di Watch Tower, cu bo mester ta cauteloso, cu bo mes ta provoca cosnan pasa cu bo.” El a keda keto, pasobra e no tabata kier a wordo husga manera e otronan, e no tabata kier ta ‘problematico’. “Bo no ta pensa, ‘esaki ta un crimen’, pasobra e no ta wordo trata asina.”

Sinembargo, rond di dje, ‘hopi adulto tabata discuti tocante muchanan cu a wordo abusa, sin compasion’. Beth ta conta cu ‘curason y alma’ di e grupo, ta cu e momento cu bo cuestiona cualkier ponencia, bo ta perde bo balor como persona. Esaki tin como consecuencia cu hopi mucha (y hasta adulto) no por bin dilanti y conta locual a pasa cu nan. Mientras cu no ta berdad cu tur (of hopi) miembro di e grupo ta abusa di mucha (sexual, emocional, psicologico of fisicamente), e cultura di proteccion di e grupo, di miedo, y di silencio ta pone cu muchanan no por conta kico ta pasando. Beth ta conta cu tin hopi publicacion di Watch Tower tocante abuso di mucha. “Na 1993, un señora cu ta traha den departamento di publicacion a conta cu el a ricibi un cantidad di carta di hende contando abuso cu nan a sufri den e iglesia, y asina nan a haya sa con grandi e problema tabata.” Bon Dia Aruba por confirma cu tin cantidad di caso mundialmente di Testigo di Jehova den corte, pa motibo di no reporta abuso di mucha.

“Mi tabata un mucha precoz”, Beth ta conta. Esaki pa motibo di divorcio di su mayornan, pero tambe door di e enseñansa di e iglesia, cu ta pone hopi responsabilidad riba e muchanan. “Nos structura social ta cambia pa e indoctrinacion di e organisacion. Bo no tin un pais, bo ta un nacion di Dios, pues no tin patriotismo. Henter e comunidad ta bo famia, pues bo no tin un famia. Bo no tin amigo normal. Mi tabatin amigo na scol, pero nada permanente, pasobra mi tabata pensa nan lo traiciona mi. Asina bo ta wordo lanta.” Pa un mucha, esaki tin como consecuencia cu e no por sa kico ta ‘normal’.

Beth a bandona e grupo, cuminsando tempo e tabata adolescente. “Mi a cuminsa un relacion cu un hoben mas grandi cu mi den e grupo.” E relacion a bira serio. “Sexualidad ta un topico demonisa den e grupo.” Pa Beth, e relacion a bira hopi presion, purbando di reconcilia su desaroyo natural como adolescente, cu e sentido cu e tabata haciendo algo prohibi. Ora autoridadnan di e iglesia a confronta Beth, el a confesa. “Pasobra mi tabata kere den dje. Mi tabata kere e doctrina, y mi tabata stima e hende.”

“Tur hende a haya sa”, Beth ta continua. “Mi a perde tur mi amigo. Mi a muri spiritualmente. Mi no tabata compronde pakico, si mi a confesa, mi a bisa sorry, mi tabata dispuesto pa haci tur locual nan tabata kier pa wordo pordona.” Pero el a sinti cu nan no tabata purba di yud’e. El a sinta pafo di un camber, mientras paden tabata entrevista su ex- pareha. “Tabata asina dificil pa sinta eyfo y scucha tur e cosnan cu e tabata bisa di mi. Insulta mi, culpa mi.” Beth tabata jong. Den e proceso, nan a bisa ‘nos a purba di yuda bo, pero bo no ta sorry’. “Mi no ta compronde con un hende por determina den un momento si bo ta sorry of no. E concepto di arepentimento den bijbel ta ‘cambia bo forma di pensa’, y mi a haci esey.”

Na final, Beth a sali di e grupo, pero no sin costo. “Mi no tin hopi contacto cu mi famia, mi ta un apostate, un enemigo di e iglesia.” Como cu e miembronan ta hende cu el a stima, su famia, su amigonan, el a dicidi di conta su storia. E enseñansa di e Testigo di Jehovah ta crea un ambiente di miedo, cu ta perfecto pa abuso tuma luga y keda scondi. Combina cu e hecho cu muchanan ta wordo siña pa confia tur miembro di e ‘famia’, y no ta wordo siña con pa proteha nan mes. Ademas, e miedo di isolacion, mirando cu e miembronan ta curasha pa no confia hende fuera di e grupo, ni crea amistad berdadero fuera di e grupo, esaki ta pone cu victimanan no tin un base pa bin dilanti.

“Falta compasion. Amor y compasion pa e victimanan. Esey ta locual Hesus a siña nos”, Beth ta finalisa.