(AP)—BET Awards a regresa ayera anochi cu un ceremonia yena cu presentacion den celebracion di 50 aña di hip-hop.
E ceremonia, cual a tuma luga na e Microsoft Theater na Los Angeles, a inclui un homenahe na e momentonan mas significante den hip-hop, organisa pa DJ y rapper Kid Capri. Cantante Patti Labelle tambe a rindi un homenahe na Tina Turner, ken recien a fayece cu 83 aña.
E show a cuminda 8or di anochi y a ser locuta riba canalnan di BET, BET HER y otro canalnan di Paramount, incluyendo Comedy Central, MTV, Nickelodeon y VH1. Rapper Drake a domina e nominadonan, ricibiendo shete nominacion, incluyendo “best collaboration” y “viewer’s choice” cu Future y Tems pa nan cantica “Wait for U.” Drake tambe a ser nomina “album of the year” y “best group” pa su collaboration cu 21 Savage, “Her Loss,” y un otro viewer’s choice pa nan cantica exitoso “Jimmy Cooks.” Lizzo y 21 Savage tabata empata pa segunda mas-nomina, cu 5 nominacion cada un.
Rapper Busta Rhymes a tuma e Lifetime Achievement Award—un di e honornan mas halto di e ceremonia. E rapper, productor y figura pionero den e escena di hip-hop, ken a ser nomina 12 biaha caba pa un Grammy, ta considera como un di e miho “MC”, cu shete exito riba Top 10 Billboard Hot 100 riba su nomber.
Bia, Coi Leray, Cutty Ranks, Dexta Daps, M.O.P., Rah Digga, ScarLip, Spice, Supercat y Swizz Beatz a rindi homenahe na Rhymes. Esaki ta un di varios momento cu a honra e legado di hip-hop, cual BET a apoya pa hopi decada via shownan manera “Rap City” y “106 & Park.”
Otro presentacion durante e ceremonia di e aña aki a inclui Chief Keef, DJ Unk, E-40, Fast Life Yungstaz & Easton (F.L.Y.), Fat Joe, Soulja Boy, The Sugarhill Gang, Tyga, Ying Yang Twins y Yo-Yo.
