Den su ultimo Indice di Prijs di Consumidor, CBS a duna indicacion di e cambio den e bestaansminimum durante e 12 luna di Januari 2022 pa Januari 2023. Den esaki por a nota un aumento di 443 florin.

Indice di Prijs di Consumo

Den e ultimo diesdos (12) luna, dies (10) di e diesdos (12) sector a registra aumento di prijs. E aumentonan cu tabatin e mayor efecto riba e CPI a wordo registra pa e sectornan di “Vivienda” (12.4%), “Cuminda y bebida no-alcoholico” (12.8%), “Transporte” (9.6%) y “Mobilario” (8.5%), causando un efecto di respectivamente, 3.09, 1.41, 1.27 y 0.77 ppt.

E aumentonan den e restante sectornan a contribui cu un efecto di 0.95 ppt riba e CPI di Januari 2022 – Januari 2023. E aumentonan aki a wordo contraresta parcialmente door di caida den e indicenan di e sectornan di “Comunicacion” (-6.8%) y “Paña y sapato” (-11.0%), cu a contribui cu un efecto di respectivamente, -0.57 y -0.30 ppt.

E aumento den e sector di “Vivienda” a wordo causa principalmente door di aumentonan di respectivamente, 23.0% y 19.0% den e categorianan “Electricidad, gas y otro combustible” y “Suministro di awa y otro servicionan relaciona cu vivienda”, causando un efecto di respectivamente, 1.75 y 0.89 ppt. E aumento den e sector di “Cuminda y bebida no-alcoholico” a wordo causa principalmente door di un aumento di 12.8% den e categoria “Cuminda”, causando un efecto di 1.24 ppt. E aumento den e sector di “Transporte” a wordo causa door di principalmente aumentonan den e categorianan “Compra di vehiculo” (16.4%) y “Gasto relaciona cu uso di vehiculo di transporte personal” (6.1%), causando un efecto di respectivamente, 0.75 y 0.50 ppt. E aumento den e sector di “Mobilario” a wordo causa principalmente door di aumento den e categorianan “Mueble y accesorionan, tapijt y otro tipo di material pa vloer” (35.0%) y “Bienes y servicio pa mantencion ordinario di cas” (5.0%), causando un efecto di respectivamente, 0.31 y 0.21 ppt.

E caida den e sector di “Comunicacion” a wordo causa door di un caida di 6.6% den e categoria “Servicio di telefon y fax”, causando un efecto di -0.53 ppt. E caida den e sector di “Paña y sapato” a wordo causa principalmente door di un caida den e categoria “Paña” (-12.3%), causando un efecto di -0.26 ppt.

Canasta di consumo

Den e ultimo aña cu a pasa 69.4% di productonan den e canasta di consumo di e CPI a conoce un aumento di prijs causando un efecto di 8.54 ppt, mientras cu 23.8% ta mustra un caida di prijs, cu a contribui cu un efecto di -1.92 ppt y pa e restante 6.9% no tawata tin cambio den prijs. Prijsnan di bienes a subi cu 10.3% y a causa un efecto di 5.96 ppt. Prijsnan di servicionan a conoce un aumento di 1.6% y a causa un efecto di 0.66 ppt.

Bestaansminimum

Den e ultimo diesdos (12) luna e bestaansminimum pa un hogar consistiendo di dos (2) adulto y dos (2) mucha (edad 0-15 aña) e registra un aumento di Afl. 443, di Afl. 4,920 na Januari 2022 pa Afl. 5,363 na Januari 2023. E aumento aki a wordo causa principalmente door di aumentonan den e sectornan “Cuminda y bebida no-alcoholico” (Afl. 254) y “Vivienda” (Afl. 181).

Cambio di prijs di petroleo, utilidad, gasolin y diesel

E prijs promedio pa bari di petroleo a conoce un caida di US$ 5.05 (-6.1%) di US$ 83.06 na Januari 2022 pa US$ 78.01 na Januari 2023.

E indice di Energia a subi cu 17.9% den e ultimo aña. E indicenan di “Gasolin” (5.7%) y “Diesel” (26.5%) a registra aumentonan, causando un efecto di respectivamente, 0.27 y 0.08 ppt. E indicenan di “Electricidad” (22.7%) y “Awa” (23.1%) a registra aumentonan, causando un efecto di respectivamente, 1.66 y 0.85 ppt. E restante 404 bienes y servicio hunto, a conoce un aumento di 4.5% y tawata tin hunto un efecto di 3.76 ppt.

Cambio di prijs di Cuminda y servicio di catering Den e ultimo diesdos (12) lunanan e indice di “Cuminda & servicio di catering” a subi cu 11.1%. E indice di “Cuminda na cas” a conoce un aumento di 12.8%, unda tur e diesun (11) indicenan di e gruponan di “Cuminda na cas” a subi durante e periodo aki. E indice di “Berdura” a conoce un aumento di 18.6%, e aumento mas grandi entre e gruponan di “Cuminda na cas”. Ademas otro aumentonan significante a wordo registra den e indicenan di “Lechi, keshi y webo” (16.2%), “Pan y otro productonan di grano” (14.8%), “Carni” (13.6%), “Bebida no-alcoholico” (13.2%), “Azeta y otro productonan traha di vet” (11.2%), “Pisca y otro cuminda di lama” (10.5%), “Sucu, jam y otro tipo di cos dushi” (10.0%) y “Restante productonan pa alimentacion” (9.2%).

E indice di “Cuminda pafo di cas” a registra un aumento di 7.0% den e ultimo diesdos (12) luna.