Director di Dutch Caribbean Nature Alliance (DCNA), Tadzio Bervoets, a anuncia cu e lo bandona su cargo na fin di luna di september.
“Cu hopi duele na mi curason mi ta anuncia cu pa fin di september mi no lo renoba mi contract como Director di Dutch Caribbean Nature Alliance. Durante tres aña maraviyoso mi tabatin e oportunidad di dirigi e organisacion maraviyoso aki hunto cu e hunta di directiva y e miembronan di e ekipo mas dedica cu mi por a spera. Tambe mi lo sigui apoya e Network di DCNA y e organisacionnan miembro di DCNA miho cu mi por”, Bervoets a menciona. E lo regresa Sint Maarten, su pais natal.
Ta duel DCNA cu nan lo perde un colaborado experto y inspira cu baymento di Tadzio Bervoets, pero e organisacion no por haci nada otro cu respeta e decision personal aki. “ Nos kier gradici Tadzio di curason pa tur cos cu el a haci pa DCNA, su miembronan y naturalesa den Caribe”, segun presidente di DCNA, señora dr. mr. Hellen van der Wal, “ y nos kier desea Tadzio hopi suerte y exito cu su aventura nobonan. Nos ta sigur cu nos camindanan no lo separa y cu e colaboracion lo continua di un otro forma.
Dutch Caribbean Nature Alliance (DCNA) ta un asociacion regional di organisacion di conservacion, cu ta inclui e parkenan nacional na e seis islanan di Caribe Hulandes (Aruba, Boneiro, Corsou, Saba, St. Eustatius y St. Maarten) y tin como meta apoya y fortalece naturalesa na e islanan.
Meta di DCNA ta proteha e recursonan biologico y ta promove desaroyo sostenibel di e recursonan natural di e islanan aki, tanto riba tera como den lama. Pa haci esaki, DCNA ta desaroyando fuente di financiacion sostenibel, como un fondo fiduciario, desaroyando capacidad a traves di tayer di capacitacion y promoviendo e naturalesa extremadamente bunita y unico, cu ta core desde selva tropical abundante te na e rifnan di coral y e seronan di santo blanco manera perla.
