Mester puntra su coleganan…
Debate tocante presupuesto a cuminsa trankil, sin tanto gritamento. Talbes a yuda cu e ministro cu ta atende e prome buelta aki no ta un hende cu ta provoca tal conducta. Sin embargo, e sesion inicial a duna un par di momento remarcabel. Parlamentario independiente Marisol Tromp a bin cu pregunta al caso tocante e centenares di persona emplea rond di e ministronan, di cual hopi no a bay segun procedemento normal pa nombramento di personal. Den hopi caso tambe no ta laga e acuerdonan di trabao core via e departamento concerni, y despues ta coregi e asunto pa loke ta salario, etc. Ta confirma anto cu di berdad ta existi un situacion di libertinahe, unda e ministronan individual ta contrata hende, sin preocupa ta ki salario nan mester bay haya segun e normanan di gobernacion.
Esey ta bisto tambe pasobra si tuma e suma cu e ‘coordinadornan’ ta costa nos, por conclui cu nan tin un promedio di salario bastante mas halto cu e averahe di e empleadonan ‘normal’ na e departamentonan. Probablemente den hopi caso nunca a tuma luga un evaluacion drechi kico por paga un persona segun su conocemento y experiencia.
A toca e punto tambe cu ta concerni na prome luga nos Prome Ministro, cu a crea un cantidad di ‘departamento’ sin cu a formalisa esaki debidamente. Asina por ehemplo tin un ‘Bureau Innovatie’ cu ta nan mes so sa kico nan ta haci. Con cu bo kier bira e asunto, e ta keda un asunto di emplea hende sin cu tin trabao fiho pa nan, sino di hopi dia caba nan lo a formalisa e departamentonan ‘semi-incognito’ aki. Simplemente un asunto di patronahe politico refina, bao e capa di modernismo y progreso.
Mientras tanto e trabao mes di ‘streamline’ e aparato gubernamental no ta avansa. Ta facil pa culpa e ministro encarga cu esaki, ta su responsabilidad primario, pero den conseho di ministro e no lo ta haya ningun sorto di oido pa con drecha gobernacion. Loke ta di aprecia en todo caso ta cu e no a haci un intento fofo pa defende e cantidad impresionante di hende rond di nan. El a duna di conoce cu ta cinco hende e tin den su despacho, tres asesor di nivel y dos “señora den front desk”, esey ta tur…
Mester bisa si cu su predecesor Yrausquin tabata esun cu a haci e ‘opruiming’ y a pone esun prome cu ne bay cu tur su trupanan di apoyo, asina cu Bermudez a hereda un oficina normal. Ta su merito si naturalmente, cu el a tene asina tambe. Un di e momentonan memorabel tabata ora den su contesta na parlamento el a declara cu mester bay puntra su coleganan mes ta pakico nan ta traha asina… Pasobra hopi hende rond di bo en principio no ta signo di sabiduria ni di profesionalismo. Ta en berdad na cada un di nan pa contesta e pregunta si ta carece nan mes ta carece di conocemento cu nan mester tanto alma rond di nan pa por funciona. Lo ta bon pa den e transcurso di e tratamento di presupuesto puntra na cada un di e ministronan ta kico ta nan splicacion specifico pakico nan tin binti, trinta, cuarenta, cien of mas cargado di tas of fotografo cu nan. Si cada ministro tin cinco hende den nan oficina, anto nos tin 45 salario pa paga, cu na e nivel actual lo costa nos 4,5 miyon florin. En cambio awor nos ta pagando 31 miyon florin na e circo ridiculo aki. Cu e sigur 25 miyon cu nos spaar nos por a haci hopi cos den otro asunto cu nos mester atende.
Tur e pensamentonan noble aki sin embargo no ta yuda den e caso di nos sistema politico putri, cu riba su mes no ta bay mehora. Hamas y nunca e reforma ey lo bin di nan mes, ta algo cu mester bin di otro banda, di ariba. E otro islanan a pasa den duro ora cu, como compensacion pa e rescate financiero cu Hulanda a ofrece, a obliga nan corta drasticamente den e cantidad di empleado di gobernacion. Anto… Corsou a sink? A bin rebeldia? A bin caos? Nan a kima e luga atrobe? No toch? Nan a cumpli cu nan parti, aunke talvez na nan cas nan ta bisa hopi cos mahos na adres di e Maca…dispensa, Hulandesnan.
Por ta cu cerca nos e dia ey no ta yega. No pasobra nos gobernantenan ta asina responsabel pa no laga e cos yega asina leu, pero pasobra Hulanda no ta laga e cos yega asina leu. Net pasobra nan mester a rescata e otro islanan, nan no ta bay ripiti esey aki na Aruba. No, nan kier pa nos mes hacie. Laga e partido den gobierno keda kere cu nan ta yega 2018 cu un ‘balanced budget’ riba papel, anto nan ta cla! Laga nan keda conta nan hendenan cu esey ta e ‘futuro briyante’. Esun cu sa miho, sa miho: tanten cu nos no yega na 40% di debe/GDP, nan no ta baha for di nos lomba. No ta nos tur ta lamenta.
