-300x225.jpg)
Tres aña pasa, Angel Bermudez a bira miembro di e gabinete Mike Eman II, sin ta politico y sin participa den eleccion. El a drenta gobierno den un circunstancia dificil y tenso den e relacion entre gobierno di Aruba y gobierno di Hulanda cu e KB cu a duna bida na e ley di LAFT y a introduci e colegio di supervision CAFT.
Awor den e cambio di transicion pa un gobierno nobo, sr. Bermudez ta sinti su mes honra y gradici pa e trabou cu el a realisa, y e responsabilidad cu a wordo delega riba dje durante e gobernacion aki. E mes ta reconoce cu no tabata facil, pa atende cu cada un di e obligacionnan cu pais Aruba tin, a pesar di e deficit presupuestario.
Entrevista
Durante un entrevista, Bon Dia Aruba a trata aspectonan di trabou pero tambe personal cu e mandatario. E ta haya cu cada aña cu mester traha riba presupuesto tabata demanda hopi di dje. “Cada aña ehecutando e presupuesto ta un reto. E no ta facil. Fei 2015 nos tin e normanan cu pais Aruba tin cu cumpli di e ley di Laft, y naturalmente nan kier cumpli cu e norma aki, el a bisa. Pero e momento nada facil ta ora cu e aña ta pasando, y bo ta yegando den e di tres of cuater kwartaal, y bo tin cu monitor si bo ta yegando pa cumpli cu e norma of bo mester bay parlamento pa un presupuesto adicional pa bay fia.” El a bisa cu ‘danki na Dios y na tur esunnan envolvi’, nan a logra durante 2015, 2016 y e no tin duda cu 2017 tambe.
Esaki ta e di dos biaha cu sr. Bermudez sin ta politico ta forma parti di un gabinete. E ta reconoce cu tabatin un diferencia substancia entre e minister di tres decada pasa cu e minister di awendia. “Pa cuminsa mi tabata 30 aña mas jong. Esaki kiermen cu mi tabatin hopi mas energia. Pero di otro banda aworaki mi tin mas huicio compara cu 30 aña pasa y mas experiencia.” Tampoco 30 aña pasa no tabatin e facilidad tecnologico entre otro di computer cu nos tin awendia. E trabou tabata demanda mas pasobra e proceso tabata uno hopi manual y cu menos comunicacion cu awendia.
Encuanto e criticanan cu sr. Bermudez no ta politico, sinembargo e ta wordo considera e minister mas politico di e gabinete aki. E ta bisa cu politica no ta un ciencia mas bien e ta un arte. E ta un arte cu e no a sinti atraccion na dje, mas tanto pa e parti negativo di difamacion y insulto personal. “Pero e ta e arte den cual den cierto momento henter e proceso di eleccion y gobernacion ta tuma luga.”
Pa ultimo riba su futuro, sr. Bermudez a declara cu recientemente el a cumpli 67 aña, y e ta spera di gosa di e mesun bida largo cu su difunto tata tabatin pa sigui disfruta di su famia. E ta bay purba atrobe di bay gosa di un pension ‘loke mi a purba tres biaha caba’.
Despues di fungi como minister pa tres aña, sr. Bermudez ta laga sa: “Mi no tin niun ambicion mas.” Tampoco e no tin niun ambicion politico, el a expresa na e matutino aki. E ta habri si pa esun cu kier haci uzo di su conocemento y experticio.
