E benta na Young Fellow a cay drasticamente pa via cu e caminda tabata cera pa motibo di trabaonan di construccion tumando luga pa loke ta Green Corridor. Aworaki ministerio di Infrastructura conhuntamente cu departamentonan concerni a logra mehora e accesibilidad pa yega Young Fellow sacando e negoshi aki for di coma segun gobierno.

“Ora bo wak hende contento bo tambe ta yena cu satisfaccion,” minister di Infrastructura Otmar Oduber (POR) a expresa despues cu den un siman a percura pa improvisa y mehora accesibilidad pa e negoshi local Young Fellow Bar and Restaurant. E negoshi aki segun e doño Glen Maduro, a sufri basta hopi e ultimo temponan aki pa motibo di construccion tumando luga pa loke ta Green Corridor. Consecuentemente a hasta blokia e entrada pa Young Fellow for di caminda grandi, ocasionando reduccion drastico di benta. Aworaki a logra mehora e accesibilidad pa yega Young Fellow, un negoshi cu segun gobierno awor ta for di un coma y lo sigui ta bibo pa hopi tempo mas. “Una bes nos a asumi responsabilidad nos a cuminsa combersa cu diferente doñonan di negoshi no solamente di Young Fellow akinan, pero tambe muffler shops y otro luganan cu tin riba caminda. Cu a sufri dramaticamente bao di e construccion cu tabata tin”, minister Oduber a bisa.

‘E no tabata husto’
“Practicamente ya for di un ocho luna nos ta sintiendo e pisa. Pero e realidad a cuminsa na 2015 dia cu a cuminsa cu Green Corridor. Eynan nos dolor a cuminsa”, doño di Young Fellow ta bisa. No cu nan tabata contra e proyecto e ta bisa, nan mes a cuminsa drecha nan luga tambe e mesun temporada. Pero mas e dianan ta pasa nan a tuma nota cu e entrada cera a cuminsa afecta nan drasticamente. “Nos a ripara cu nos a muri completamente unda ni turista ni busnan tabata bin akinan. Hopi hende tampoco no tabata pasa den e molester pa bay via di patras. E no tabata husto.” Tabata tin dos borchi di verboden cu of a lubida of no a haya chens di pone cerca di nan entrada. E falta di esaki a causa cu tabata tin un accident algun tempo pasa eynan sr. Maduro. Awor por mira e borchinan claramente cu ta indica unda cu no mag di subi cu bo vehiculo pa e fluho di trafico bay debidamente, e doño a expresa.

Accesibilidad pa negoshinan
E mandatario encarga cu Infrastructura a comenta cu hopi negoshi a sufri pa via cu no a tene cuenta pa e accesibilidad na nan ora a cuminsa cu construccion. Minister Oduber(POR) ta bisa cu e siman aki manera cu a tuma e decision cu no ta bay perhudica ningun comerciante mas y pa habri e camindanan pa acceso na negoshinan, team di DOW a bay den accion mesora. “A pesar cu den e plan original di e Green Corridor no tabata por of no tabata kier , nos a combersa cu DOW y bisa cu nos lo pone algo pa improvisa aworaki den e dianan di fiesta pa tin acceso na tur e negoshinan aki. Y naturalmente percura e aña cu ta bin pa formalisa tur e acceso for di caminda grandi na e diferente edificionan aki”, e mandatario a splica. Naturalmente bo no lo por haci e cu tur e negoshinan den futuro ora tin hopi edificio segun e minister a sigui elabora. Pero companianan manera Young Fellow cu tin hopi añanan ta existi, cu su clientenan y hendenan cu semper tabata bin.

Menos acceso pa motibo di siguridad
Den e plannan original cierto momento a bisa cu ta prefera pa tin menos acceso posibel pa motibonan di siguridad, segun e mandatario ta bisa. “Pero mi ta kere cu den e planificacion mester a percura pa tin e siguridad y pa e camindanan aki t’ey pa negoshi cu t’ey hopi aña caba mas prome di e desaroyo cu nos tin di e careteranan aki. Y bo ta mira cu un tiki creatividad bo ta logra”, e minister ta bisa. E ta sigui comenta cu logicamente esaki ta improvisa aworaki y lo mester bay haci e na un forma mas structura pa tur e negoshinan cu tin banda di caminda.

Trabaonan riba otro camindanan
Minister Oduber a bisa cu e team di DOW den un forma ‘relampago’ a haci locual a wordo bisa anteriormente cu no por wordo haci. Den futuro ta bay mira rapidamente pa loke ta trata Watty Vos Boulevard, Green Corridor y otro camindanan trabaonan tambe lo sigui den anochi manera menciona caba pa no perhudica hende. E mandatario ta bisa cu nan a percura pa acelera e trabaonan pa e rotondenan wordo habri pa specialmente den e temporadanan druk aki di dianan di fiesta, y percura tambe pa comercio haya su acceso necesario.