Den un conferencia di prensa inespera Partido AVP a ofrece un declaracion tocante e ultimo acontecimento cu a bin sosodiendo den relacion cu un di su miembronan di partido.

Lider di partido Mike Eman a señala cu decisionnan cu ta wordo tuma na nivel di husticia y Ministerio Publico ta purba di influencia y interumpi e proceso electoral den ultimo añanan y for di cualkier influencia di algun forsa cu ta supone di traha den imparcialidad pa comunidad por tuma un decision huicioso den un proceso electoral.

“Lamentablemente lo cual nos ta mira awe den un pleno proceso electoral atrobe, den influencia, discusion, debate cu ta wordo crea den comunidad cu ta parce un sincronisacion entre Ministerio Publico cu mester tin na tur momento su obhetividad no pa pone bentaha riba ningun partido politico”, Eman a sigura.

Asina mes, el a declara cu a wordo manda un carta di abogado pa Ministerio Publico -e cual Bon Dia Aruba ayera a publica un articulo den edicion di ayera- pa puntra nan kico ta e intencionnan pa motibo cu e ta un politico y cu nan ta mira cu e caso ta canando den otro direccion.

“Pa 25 di juni sa cu no tin nada cu ta bay kita nos determinacion” Eman a expresa.

Di su parti, Oslin Benito Sevinger conoci como ‘Benny’ a tuma palabra y a trece dilanti cu esaki ta di dos eleccion cu su persona ta bayendo como sospechoso, tambe el a recorda cu for di dia 2 di october 2019 ora el a haya e prome bishita di Lands Recherche na su cas hunto cu Ministerio Publico pa cuminsa haci un investigacion e no a tende nada mas di e caso te e aña aki.

“ E caso a cuminsa pa un persecucion politico y ta yega momento pa puntra con leu e husticia ta bay”, Sevinger a comenta.

Ademas, el a indica cu el a bay cerca su abogado pa motibo cu ta un aña di eleccion pa asina haya conseho, pa e sa na unda e ta para y cu probablemente nan lo pone un bui p’e y deten’e pa loke el a sigura cu “a mi no ta bay huy ni mi ta bay ni un caminda”.

Lesando e carta cu Ministerio Publico a contesta pa Sevinger, el a destaca cu ta bisa cu nan no tin nada contra su persona, cu nan ta investigando ainda y cu nan lo tuma un decision probablemente no prome cu dia 1 di september, pa loke el a conclui cu nan a bisel’e “haci loke bo tin cu haci”.

Di mesun manera, el a afirma cu den proximo dianan nan lo tin cu mira con e situacion lo sigui cana pa nan lo tuma un decision “den nomber di mi famia, di mi votadonan, di mi partido y di Aruba” Sevinger a finalisa.

Mientrastanto, den dianan aki diferente persona a wordo deteni den caso aki yama ‘Avestruz’ cu tin di haber cu presunto corupcion den otorgamento di terenonan den gobierno anterior.