Caso Avestruz ta e caso mas grandi di corupcion di tereno na Aruba. Un total di 11 sospechoso ta wordo acusa den e caso, caminda e sospechoso principal ta ex-minister y actual parlamentario di AVP, Sr. Oslin “Benny” Sevinger.
Durante e proximo dianan Bon Dia Aruba lo detaya un biografia chikito di cada di e sospechoso pa asina pueblo di Aruba por conoce e sospechosonan aki un poco mas y kico ta e acusacionnan contra e sospechosonan aki.
Oslin “Benny” Sevinger
Sevinger a cuminsa su carera politico bao di hala Edgar “Watty” Vos, ken a fayece na 2001. Durante e eleccionnan di 2001 el a subi lista di candidatonan di AVP y a logra gana un asiento den Parlamento di Aruba. El a permanece den Parlamento te cu 2009.
For di 2009 te cu 2017 a eherce su trabao como minister. Cu Gabinete Mike Eman I e tabata Minister di Integracion, Infrastructura y Medio Ambiente. Cu Gabinete Mike Eman II el a eherce como Minister di Integracion, Infrastructura y Desaroyo Teritorial. Bao di su Ministerio a aborda diferente proyecto, como Watty Vos Boulevard y e ampliacion di hospital, entre otro.
Caso Avestruz
E caso Avestruz ta centra ariba e soborno oficial, labamento di placa y falsificacion di terenonan erfpacht di 2009 pa 2017. Sevinger ta wordo acusa di falsificacion, estafa, tumamento di regalo of promesa, labamento di placa y abuso di su funcion. Dia 25 di mei 2021 Sevinger a keda deteni, un luna prome cu eleccionnan a tuma luga, den cual el a participa ariba lista di AVP. Sevinger a logra suficiente voto y a huramenta como parlamentario.
Despues di dos luna el a sali den libertad y actualmente ta na spera di e tratamento di e caso, cu lo cuminsa den luna di april di e aña aki.
Ewald Biemans
Sr. Biemans ta propietario di Bucuti & Tara Beach Resort y ta conoci pa su compromiso cu sostenibilidad y medio ambiente. Biemans a wordo honra ariba diferente ocasion na nivel nacional como tambe internacional pa su trabao di conservacion di medio ambiente y sostenibilidad.
Un di su logronan mas recien tabata durante COP26, e Conferencia di Nacionnan Uni di Cambio Climatico 2021, caminda cu Biemans a ricibi premio for di Barack Obama como top hotelero den sostenibilidad.
Acusacion den caso Avestruz
Pa hopi e tabata un sorpresa ora cu su nomber a wordo nombra den e lista di sospechosonan den caso Avestruz. Biemans ta wordo acusa pa Ministerio Publico di soborno di ambtenaar entre januari 2014 pa december 2017.
