Den un reunion cu partido AVP a tene cu su siguidonan, campañado y futuro candidato dialuna ultimo na Cas di Partido, parlamentario Benny Sevinger a informa cu su yiu muhe Stephany Sevinger lo bira su sucesor politico, Esaki mirando su situacion legal unda na juli ultimo Corte di Apelacion a dun’e un castigo di 4 aña di prison cu 3 aña condicional y pa 5 aña e lo no por eherce ningun funcion publico relaciona cu e caso Avestruz.

“Cu un veredicto asina, bo por bay eleccion, mi por bay eleccion, pero mi no ta kere e ta etico pa bay eleccion. Pasobra bo tin cu clear bo nomber prome, den e caso aki pasobra tin un veredicto y esey nos ta bay haci tambe. Pero esey no ta kita cu nos ta bay bringa, nos ta bay campaña, nos ta bay cana, pasobra e gobierno aki nunca mas mester bolbe drenta. Esey ta nifica tambe cu Benny Sevinger lo no ta riba e lista, pero Mike a anuncia Stephany riba e lista,” Sevinger a informa mediante un reel publica riba su Facebook page.

Algun siguido di e partido berde a celebra e anuncio aki dunando nan sosten na e yiu muhe di Sevinger, esta, Stephany Sevinger. Pa otronan e opinion ta diferente, manera: “Awo cu bo a caba di vota den parlamento awo si ta bisa no ta etico pa bay eleccion pa clear bo nomber prome pasobra tin un veredicto?? di hopi tempo caba mester a hala atras … esey ta etico…..” e usuario a expresa.

Na luna di juli ultimo, Ministerio Publico por medio di su vocero Patrick van der Biezen a informa cu Corte de Apelacion a sentencia Sevinger pa soborno unda cu conhuntamente cu Leoncita Arends a estafa pais Aruba ricibiendo soborno di Peter Susebeek, ken tambe a ser condena pa, entre otro, labamento di placa di 1.3 miyon dollar. Ministerio Publico tambe a anuncia cu nan lo no apela e decision aki.

Van der Biezen tambe a señala cu Sevinger a abusa di su funcion como minister unda cu den prome instancia den esaki a ser declara liber y den apelacion a ser sentencia pa esey y di ultimo, pa malversacion (verduistering) . E castigo cu Ministerio Publico tabata pidi ta 4 aña incondicional, cu pa 8 aña no por ta miembro di parlamento y pa esaki corte di apelacion a dicidi un castigo di prison di 4 aña di cual 1 aña ta condicional, cu un tempo di prueba di 3 aña y tambe cu e no por fungi como funcionario publico mas pa un tempo di 5 aña.

Caso Avestruz ta enfoca riba soborno, falsificacion y labamento di placa pa loke ta trata otorgamento di terenonan den gobierno di e periodo desde aña 2009 te 2017.

Na januari 2021 autoridadnan cu ta encarga di haci investigacion, entre nan unidad di RST y

Landsrecherche a haci un entrada hudicial den cas di Sevinger parlamentario di partido AVP

y tambe na otro luganan pa loke ta trata e caso di investigacion denomina Avestruz.

E entrada hudicial tabata pa motibo cu tabatin sospecho cu tempo cu Sevinger tabata mandatario lo haci cosnan cu tabata contra ley, Sevinger a duna di conoce cu e ekipo di personanan aki a yega na su cas 6.30 di mainta pa haci un otro bishita y busca un telefon, manera el a indica “el que nada teme, nada debe, mi no tin nada di sconde”.

Esaki tabata e di dos biaha cu autoridadnan y ekipo di investigacion a haci un entrada hudicial na cas di Sevinger unda el a sigura “cu no ta straño pa nan bin un biaha mas pasobra e aña aki ta di eleccion”, el a bisa na 2021. E prome entrada hudicial na su cas tabata na luna di october di 2019 na unda el a bisa cu nan a drenta “pa busca droga, armanan y computer”.

Debi na esaki, tabatin cierto inkietud tambe den seno di partido berde na aña 2021 ora Sevinger a dicidi di subi riba lista di partido AVP pero cu e number 29.

Dia 5 di juni 2021 den pleno temporada di campaña electoral, Sevinger a bay cera na KIA caminda su famia, amigonan y siguidonan- incluyendo e lider di e partido mes, Mike Eman- a bay para dilanti KIA pa asina ey duna sosten na Sevinger ken igualmente a participa den eleccion di 25 di juni 2021 y a haya 1.614 voto.

E resultado aki a causa conmocion den comunidad, mirando cu Sevinger ta envolvi den e caso Avestruz y asina mes el a haya respaldo di esnan cu ta confia den dje como politico, Ministerio Publico a dicidi di dun’e su libertad cu cierto condicionnan pa asina ey dia 6 di augustus por a huramenta como parlamentario na Cas Ceremonial di Gobernador Alfonso Boekhoudt, algo cu di otro banda, tambe a ser cuestiona mirando e situacion hudicial di Sevinger.

Dos dia pasa Gabinete Wever-Croes a informa cu a entrega su retiro, esey ta nifica cu lo tin eleccion dia 6 di december manera a ser anuncia, partidonan for di algun tempo ta bin preparando y haciendo campaña y esaki ta un push cu nan lo tin pa planifica nan lista di candidatonan mas lihe di loke tabata di spera.

Pa e motibo aki, Sevinger a dicidi di hala un banda y laga su yiu bin den politica pa asina por continua e caminda di su tata cu e biaha aki si a dicidi di retira tanten “lo clean” su nomber prome, manera e mes a sigura.