Ayera mainta, oficialmente Corte di Prome Instancia di Aruba a cuminsa trata e caso penal Avestruz, unda cu for di 8or di mainta diferente abogado, acusado y famia a yega na e prome di varios dia cu e caso aki lo wordo trata.

Ayera 7 y awe 8 di september e sospechosonan di inicial P.T.A.S, C.D.H y Oslyn Sevinger (Benny) a presenta na Corte pa interogacion. Primeramente a treci dilanti e parti di acusacionnan contra e fundacion Curason Berde, unda segun por a compronde, e delito di labamento di placa a tuma luga.

Un di e tres acusadonan a nenga di contesta ayera e preguntanan di hues, ya cu segun el a indica, el a wordo interoga varios biaha como testigo y el a contesta casi 3.000 pregunta. P’esey el a sigura cu no tabatin necesidad pa contesta ningun di e preguntanan, lagando esey na su abogado.

Ademas, abogado Vito Carlo, defensor di un di e acusadonan, a expresa cu door cu e caso ta basta complica, su cliente a busca un specialista riba e ramo pa cual e ta sospechoso, y Hof na dos ocasion a nenga esey, pa motibo cu solamente abogadonan cu ta registra na Hof na Corsou of Aruba por bringa leynan dilanti Corte den e region. Si ta bin un abogado Hulandes, e mester pidi permiso na Hof pa e por para banda di e abogadonan local.

Segun Carlo a menciona, Hof a bis’e cu e caso no ta complica y cu e mes por hacie. Dialuna ultimo el a pidi un formalidad pa laga abogado prepara tur cos, esey ta su area, pero esey no a wordo honra. “Esey ta hopi straño, toch? Tin hues special busca di Hulanda, fiscalnan, hasta Landsrecherche cu a wordo busca di Hulanda, pero nos Arubianonan mes,, cu mester defende nos mes, si no mag di busca un abogado di Hulanda”, el a bisa.

Igualmente, el a afirma cu e idea ta cu e lo ta presente, e lo ta sinta hunto den toga cu otro dos abogado cu ta haci e caso. “Pero no ta husto cu un sospechoso den un caso asina grandi ta wordo kita su derecho di tin e abogado cu e kier pa e defende”, el a expresa.

Carlo a menciona cu su cliente ta den proceso di entrega un keho pasobra su derechonan fundamental como sospechoso a wordo trapa.

Tocante e caso – unda sospechoso- y abogadonan a sali prome cu 12or di merdia di corte – Carlo a declara cu hues tabata hopi specifico riba e puntonan. Segun Carlo, durante e caso hues a molestia cu Ministerio Publico, pa motibo cu el a puntra di kico Carlo su cliente – kende ta wordo acusa di labamento di placa – ta wordo sospecha, pa motibo cu Ministerio Publico no a specifica precies kico el a laba y di ki forma. Carlo ta sigura cu esaki ta “pasobra nan no tin prueba”.

Esaki ta e prome zaakdossier cu ta wordo trata di e caso Avestruz, y pa esaki, e otro acusadonan mester ta presente na corte dia 25 y 26 di october, 3, 4 y 9 di november. Dia 10 y 11 di november ta bay tuma luga e requisitorio y for 12 te 16 di december ta bay tuma luga e pleidooinan, manera Ministerio Publico a informa riba e schedule di e caso aki.

Di su parti, na momento cu e tabata sali for di corte, Oslyn (Benny) Sevinger a declara na medionan local cu e nunca a haya su mes den problema hudicial y e dia di ayera tabata un experiencia pa su persona. “Mi a haya un hues manera echt un profesor, cu sa kico ta puntra. El a bay den e dossier y a haci mi preguntanan al caso y mi a contesta tur su preguntanan manera cu e ta. Ami ta sinti cu el a bay bon, cu mi ta trankilo di e banda ey”, el a comenta.

Fiscal y Ministerio Publico ta acusa cu den fundacion di Sevinger, Curason Berde, el a haya donacion y esnan cu tabata haci e donacion tabata haya terenonan erfpacht di gobierno como beneficio. Di esaki Sevinger a comenta cu na momento cu politiconan ta haci campaña, ta avisa nan pa crea un fundacion pa tur cos por ta na ordo. “M’a cana e caminda legal ey, awor bo kier usa esey pa purba di colga mi na dje, esey ta loke Ministerio Publico kier a haci.”

Igualmente, el a sigui splica cu ora nan ta haci campaña nan ta pidi casi tur comerciante pa cumpra lunch, rifa y pa haci donacion. Algun di nan segun Sevinger a sigura, tabata dispuesto pa haci donacion na e fundacion “y abo como candidato hopi biaha bo no sa ni cuanto donacion nan a haci na e fundacion, i ken a haci e donacion den campaña. Y ta papiando di hopi hende, mi tin un team cu ta campaña pa mi di 70 hende, kiermen tin 70 hende cu a pidi donacion, cu a hiba placa na e fundacion. Unico cos bo ta haci den e team di campaña ta cu tin cu cumpra T-shirt, pechi, nos tin cu paga corant, nos tin cu paga TV y bo ta puntra esun cu ta handle e fundacion si tin suficiente placa pa paga esey y bo ta paga esey. Awor cu nan a bay haci investigacion di 10 of 20 aña ariba bo fundacion pa wak ken a haci donacion 10 aña pasa, anto 5 aña despues el a haya un solicitud pa un tereno y awor bo kier link na otro? E ora ey bo por cera tur minister, tur politico, pasobra esey tur ta haci”, el a sigura.

Segun su opinion, Ministerio Publico no tin pruebanan pa hay’e culpabel y cu pa motibonan politico su persona tin cu bay Corte.