ORANJESTAD – Dentro di algun siman gabinete  Wever- Croes lo haci 1 aña y mei ta goberna nos pais!  Pueblo a eligi un parlamento di tal forma cu a scoge pa un coalicion wordo forma pa goberna nos pais y pa presenta solucionnan pa e diferente problema cu tabata asota nos  di cual e problema mayor un crisis ‘financiero economico!’

Awor 1 aña y mei despues kico ta e resultado financiero y economico di e maneho al respecto.  Pa loke ta trata e maneho financiero ta un hecho cu gabinete Wever Croes mas trempan a scoge cu presion di e.o. CAft pa hiba un maneho financiero basa riba ‘mas medida’  ta conoci cu bou di AVP su gobernacion ya caba tabata tin un lista di medida pero tabata mes conoci cu partido MEP cu tin e signaturo di e actual gobierno a priminti sagradamente cu nan lo no goberna basa riba medida pasobra nan a studia e problematica y esaki lo no tin mester!!

Pa locual ta trata e maneho economico cu ta cay bou di e mesun Ministro di Financia tabata notabel  cu a dura un aña prome cu a presenta locual gab. Wever Croes ta considera un vision na unda a señala 5 tereno cu despues a wordo aumenta pa 6 tereno unda gobierno lo a accentua su maneho e.o.

1. Turismo ( di mes!), 2. Economia di conocemento,

3. Agricultura, 4 Logistica,

5. Economia Circular y 6. Economia creativo

locual tabata notabel ta cu e asina  yama ‘economia blauw’ cu tanto a wordo papia di dje No a logra di ta den e top 5 ni e top 6 locual a indica diferencianan di opinion serio di gabinete Wever Croes riba e maneho aki.

PPA ta di opinion cu despues di e publicacion aki  no a sigui un maneho cu ta refleha e atencion y inversion di parti di e gobierno aki pa e terenonan menciona. Tampoco por a tuma nota di un maneho di incentivo pa stimula atencion di sector priva pa e terenonan menciona. Cu otro palabra segun nos humilde opinion falta un maneho economico mas dinamico aki.

Tambe PPA kier accentua cu ningun di e terenonan menciona no ta refleha e area den cual e actual gobierno ta kere  cu lo desaroya su mes den un di tres of di 4 pilar economico pa nos Isla. Lagando e futuro Upgrader como e posibel di 2 pilar locual actualmente ta seriamente den duda tambe.

Nos Industria Turistico:

Analisando e maneho di nos actual gobierno pa cu Turismo nos ta haya falta di  un vision concreto of ideanan concreto cu ta demostra e meta pa ‘diversifica’ nos producto di Turismo.  E vision 2030 di nos aeropuerto a wordo formula bou di e gobernacion anterior! E resultado a wordo presenta na nos actual ministro nobo encarga cu Turismo.  PPA ta di opinion cu nos mester ‘eleva’ nos producto di Turismo cu MCI .convention’ tourism, golfersdestination, health & wellness tourism, yachttourism y SN Our Caribbean Town. E hecho cu lo bin un  Hotel 5 star acerca PPA ta di opinion cu ta positivo. Nos a tuma nota di algun proyecto chikito manera e ‘boardwalk na Malmok’ y algun otro intencion pero un cambio serio y profundo pa ‘diversifica’ nos producto di turismo ainda nos no a mira! Tambe PPA ta di opinion cu falta atencion pa e.o. Climate Change y Rising sea Waters.

Port City !!

E vision di un ‘port city’ tambe a inicia bou di gobernacion di AVP.  No kabe duda cu kisas gabinete Wever Croes a ‘update’ e.o. cu un World Trade Center/Convention center cu ta un idea cu PPA a defende pa añanan como unico organisacion politico cu ta mira esaki como un desaroyo economico cu por conduci na un otro pilar economico.

PPA tin esaki mare na un Universidad Internacional y 2 business hotels pero no a tuma nota ainda di e parti aki cu indudablemente ta hopi necesario tambe.

E upgrader ??

E upgrader ta den problema serio pa motibo di e crisis  na Venezuela y PDVSA! Algo cu PPA a señala den mas cu 20 articulo na 2016. Sinembargo tanto e gobernacion anterior como 20 di 21 miembro di parlamento a aproba pa Aruba drenta e Aventura aki. PPA kier accentua cu  nos ta den un Aventura actualmente pero si encaso cu e Upgrader bira realidad e Aventura aki lo rek su mes ainda mas…No ta solamente desaroyo positivo lo tin e momento ey pero diferente momento unda e berdad duro….esta e aventura lo bati na porta.

Plan B !!

Cu e crisis y Aventura di e upgrader ta keda ainda mas bisto cu nos actual gobierno No tin un ‘plan B’ pa cu desaroyo economico real na San Nicolas.

E intencion di ehecuta un hotel ‘all inclusive’ di 600 camber y 300 camber European style ta ricibi sosten di PPA como excepcion debi na e crisis economico di San Nicolas  unda ningun gobierno NI esun anterior NI esun actual no a presenta Plan B si encase e Upgrader faya….

PPA ta kere fielmente cu San Nicolas tin derecho riba progreso y PPA a presenta nos vision for di final di decada 90  y a wordo ripiti den cada programa di PPA bou di e titulo; ‘The agenda for San Nicolas’ den cual tin e.o. Shipbuilding & Shipservices, un ContainerHub, cruiseship development, e centro comercial di SN lo yega na e tereno di haf etc.

Lamentablemente nos actual gobierno no tin su propio vision y esaki ta conta pa participacion di 3 partido politico!!

Oranjestad nos capital!!

Oranjestad nos capital  tambe ta den problema hopi serio y durante un aña y mei nos actual gobierno NO a logra produci solucionnan propio pa cambia e crisis pa un direccion positivo.

PPA ta di opinion cu un maneho economico serio  mester dedica atencion na un solucion pa cu e centro di Oranjestad.  No por sigui asina…..mester di un vision digno di ser vision pa desaroyo di nos capital Oranjestad.  Nos caya principal y demas cayanan rond di dje merece atencion y un maneho di incentivo pa stimula cu comerciante/entrepreneur por participa den salbacion di nos  Centro di Oranjestad nos capital..

Na varios momento PPA a tende cu no tin financia pa ehecuta un maneho economico….cada bes cu nos tende esaki PPA ta comprende cu  unda cu no tin vision simplemente no tin solucion pa e problemanan pa cual un gobernacion nobo a wordo eligi pa soluciona.

Concluyendo e  maneho di ultimo aña y mes  no a duna contesta riba varios problematica economico di nos pais.

A yega tempo pa No sigui hiba un maneho di tira falta riba e gobernacion anterior  pueblo sa nan contribucion na e crisis pero e actual gobierno a wordo forma pasobra partidonan politico a bay eleccion bisando pueblo cu nan tin e contesta riba e dolornan aki.  Wel 3 partido politico cu 3 programa politico cu a forma un programa di gobernacion mester por produci solucionnan serio pa e.o. nos economia Aruba.

Mester di un vision  y maneho pa salba Oranjestad y San Nicolas dentro di un Vision pa pais Aruba den su totalidad. A bira tempo.

Exito cu e mision aki !!