Ultimo lunanan e.o. pais Aruba parti di Reino Hulandes ta den crisis a consecuencia di tanto mal gobernacion, Mega debe sigui pa Covid 19. Ta un hecho cu durante e crisisnan menciona e diferente gobierno di Aruba no a actua debidamente.

Aruba a haya su mes lomba contra muraya di Hulanda a consecuencia di varios ‘eror historico’ di tanto gabinete Mike Eman (AVP) como gabinete Evelyn Wever Croes cu awe Aruba parce ta lomba contra muraya sin sa ki direccion pa tuma. Dos MEGA Rijkswet Hulanda kier pusha den stoma di gabinete Wever Croes su curpa pa kita ainda mas di nos status aparte/autonomia. Esaki ta demostra cu Gobierno Hulandes NO tin confianza den gabinete Evelyn Wever Croes tampoco!

Eror historico bao di avpa.

Bao di gab Mike Eman (AVP) e siguiente eror a wordo haci:

  1. A crea un Mega debe di otro mundo pa un pais chikito manera Aruba.
  2. A cay pa presion Hulandes cu kier a introduci un Rijkswet pero cu a wordo cambia pa un ley nacional esta un LAFT a consecuencia di cual un CAFT a funciona for di Corsou y a controla Aruba desde 2016.
  3. E palabracion cu gobierno di Reino tabata cu e LAFT lo a keda en todo caso pa un periodo di 3 aña!

Ta bon pa anota cu e oposicion di e tempo ey partido MEP a organisa un marcha di protesta contra e introduccion di e LAFT pasobra Bao di liderato di Wever Croes a wordo considera como un traicion contra e Status Aparte cu a wordo logra bao di liderato di sr. Betico Croes qepd!

Eror historico bao di mep

Na 2017 Aruba a manda gab. Mike Eman pa bankinan di oposicion y un gobierno nobo a wordo forma pa MEPORED cu a bira gabinete Wever Croes.

Durante aña 2018 Staten di Aruba den cual tin un mayoria di MEPORED a dicidi di pasa ‘amandementnan’ den e ley di LAFT kitando e ‘controle’ for di gobierno di Reino y pas’ele pa parlamento di Aruba.

Mientras tanto gobierno di Reino a forsa gabinete Wever Croes pa nan firma un protocol fecha 22 di november 2018 den cual a palabra cu mientras Staten kier a bay pa Nort e protocol tabata bay pa zuid.

Esaki a bira un ‘eror historico’ pasobra den e protocol a palabra cu lo continua cu e Ley di LAFT cu lo a caduca 31 di December 2018. Esaki ta nifica cu e propio x Lider di oposicion di MEP cu a guia e marcha cu a conduci na kiebra di parlamento y hasta candela pafor pasobra segun su persona cu e ley di LAFT lo ta un ‘traicion’ contra nos Status Aparte a dicidi di prolonga e ‘traicion’ aki pa medio di e protocol firma!

Mientras tanto Gobierno di Reino a gana e confrontacion cu Staten di Aruba door di a haya gab Wever Croes asina leeuw pa laga su propio coalicion den Staten cay cu na su turno a tuma esaki den un silencia notable. Algo cu normalmente lo a causa un caida di gobierno (6 juni 2019).

Mientras tanto anja 2019 a pasa unda CAFT ‘sin base legal’ tabata usa un Ley di LAFT cu a caduca legalmente fecha 31 di December 2019 pa controla gobierno di pais Aruba su maneho financiero economico.

Covid 19 ta bati na porta

Mientras tanto aña 2020 a habri y mundo a wordo confronta cu un pandemia di Covid 19 cu a afecta tanto salud publico como economia di Aruba.

PPA for di oposicion pafo di parlamento a mustra cu Aruba lo mester haci uso di nos Statuut pa Reino Hulandes capitulo 3, articulo 36 etc. pa pidi sosten financiero economico Hulandes durante e pandemia aki!

Notable tabata cu gab Wever Croes tabata na punto di pidi e sosten financiero economico aki basa riba e protocol di november 2018 y e LAFT caduca algo cu PPA a señala lo a perhudica Aruba seriamente.

PPA por a tuma nota cu Ministro Presidente Wever Croes a declara algun bes cu ta Hulanda a conseha nan pa manda nan peticion basa riba e protocol di november 2018 y e LAFT caduca.

E declaracion di PPA a conduci cu gobierno a pensa nan mes un rato mas y a dicidi di pidi ajudo hulandes basa riba ambos esta tanto e protocol di november 2018 y e LAFT caduca (ya caba tabata un eror historico!) y nos Statuut pa Reino Hulandes cu ta pone e fundeshi pa ‘Cooperacion, ayudo y asistencia!) entre partners den Reino. Otro eror historico!

Mientras tanto durante di e ayudo di e prome y di dos tranche gobierno di Reino a cuminsa pone ‘condicion’ pa nan ayudo na e paisnan den Reino cu NO ta cuadra cu e espirito di nos Statuut pa Reino Hulandes.

Pero esaki tabata cuadra mas cu e ‘espirito di e protocol 2018 y e ley di LAFT caduca cu a inicia Bao di AVP y a continua cu bendicion di Min Pres Evelyna Wever Croes cu ta encera un proceso cu E mes a cualifica den pasado recien como un ‘traicion’ contra di nos Status Aparte cu e pueblo a logra Bao liderato sr Gilberto Francois ‘Betico’ Croes qepd.

E di tres Tranche di fondo a wordo anuncia cu mas condicion ainda…..DOS LEY DI REINO (Rijkswet) y 18 condicion cu gobierno lo mester acepta den nomber di Aruba.

  1. Gobierno di Reino kier pone Aruba cay tambe Bao di e ‘Rijkswet RFT’! (cu Corsou y St. Maarten a haya na 10-10-2010 ora cu nan debenan a wordo paga door di Hulanda).
  2. Introduccion di un entidad cu lo controla ‘inversion’ den e paisnan y sigur no mester wordo compara cu e FDA cu Aruba a conoce den pasado. E entidad CHE lo bay controla y hasta ‘dicta’ riba gobernacion Arubano anto pa un miserable suma di 200 miyon actual cu lo por crece pa 500 miyon pa fin di aña. E ley di Reino pa medio di CHE…..lo por mishi riba tereno di Husticia, Reformacion economico, Enseñansa, Infrastructura y cuido. Esaki ta demostra un falta di confianza enorme den Gab Wever Croes di parti di Hulanda apesar cu Hulanda ta practica e expresion ‘Luister naar mijn woorden maar kijk niet naar mijn daded’.

Diripiente despues di a gobierno Aruba nan so y a comete tantisimo ‘eror historico’ nos flamante Min Pres a dicidi cu e mester tuma conseho di e gremio y partido politico algo cu e mester a haci hopi prome caba pero a laga para te na momento cu E a sinti su mes totalmente lomba contra muraya pa Hulanda.

Biahe pa Hulanda… ‘ja, mits y mas draagvlak’?

Despues di e reuni cu gremio/sindicato/ fraccionnan den parlamento y Lidernan politico sra Min Pres a subi avion di KLM pa bay Hulanda sin cu a informa tur e gremio/partido politico cu e tabata bayendo.

E biaha en todo caso pa confronta Gobierno di Reino tabata un bon decision sinembargo di locual a wordo publica den prensa Hulandes y di declaracionnan di ‘staatssecretaris Knops’ Min Pres lamentablemente NO a logra net nada na Hulanda. Segun prensa Hulandes e lo a informa gobierno di Reino ‘Ja, mits’

y cu e ta bay Aruba bek pa busca ‘mas draagvlak’…algo cu a lanta hopi pregunta cerca hopi cu ta analisa mas profundo. Si Aruba lo a rechasa e DOS condicionnan principal esta e Rijkswet RFT y e 18 condicion anto pakico lo mester di ‘mas draagvlak’? Esaki ta nifica cu Min Pres lo a priminti Gobierno di Hulanda cu e lo bay di acuerdo cu nan pakete pero duna mas tempo pa busca mas ‘draagvlak’.

Negociacion cu Hulanda

Mientras tanto bek na Aruba Wever Croes a anuncia cu pa diaranson siman pasa lo e mester a manda un contesta pa Hulanda. Tambe lo e a declara cu nan ta negociando cu Hulanda. Algo cu na Hulanda den ‘Haagse Kringen’ ta wordo seriamente cuestiona cu esaki realmente lo ta e caso.

Ultimo a tende cu Aruba pa medio di nos Min Pres lo a manda un ‘counter proposal’ pero ningun di e gruponan cu cual a reuni No ta na altura di e eventual contenido. Tambe por a tuma nota di un esfuerso di Min Pres pa compara e Entidad nobo cu Hulanda kier impone cu e FDA den pasado algo cu simplemente No ta di compara.

No cabe duda cu Aruba ta den un problema hopi grandi, y cu Aruba ta lomba contra muraya pero NO a consecuencia di e Mega debe y COVID 19, pero a consecuencia di un racha di ‘eror historico’ di parti di gab. Wever Croes sosteni pa MEPORED.

E pregunta ta: Si otro ‘eror historico’ lo wordo tuma atrobe?

 

Statuut pa reino Hulandes capitulo 3, articulo 36
 Statuut pa Reino Hulandes capitulo 3, articulo 36 tin un historia cu e t’ey den nos Statuut! E t’ey pa obliga e partnernan den Reino pa yuda otro ora cu un of mas haya nan den crisis serio. E espirito di Statuut NO ta duna espacio pa condicionnan manera Gobierno di Reino ta forsa riba Aruba, Corsou y St. Maarten.

Y si e paisnan aki nenga e condicionnan di gobierno di Reino. PPA NO ta kere cu Gobierno di Reino lo nenga di yuda nan. No cabe duda cu e politiconan Hulandes di awe ta ‘zuur’ pasobra nan a hereda un Statuut cu ta basa riba un historia di colonisacion y sclavitud. Statuut tabata e ‘stepping stone’ basa riba presion di pais y instancia Internacional manera Nacionnan Uni pa duna e paisnan cu a wordo colonisa espacio pa goberna nan mes dunando nan e derecho di autodeterminacion y e espacio pa goberna nan mes.

Mientras cu articulo 43 lid 2 ta duna Gobierno di Reino e ‘waarborgfunctie’ limita pa intermedia ora ta necesario…..articulo 36 ta pone un deber riba tur partner den Reino pa yuda otro ora bira necesario ‘cooperacion, ayudo y sosten’ esaki bao di ningun forma ta duna Gobierno di Reino (lees Hulanda) pa forsa e paisnan ‘memey’ di un crisis pa acepta cambio den nan structura (Status Aparte) como un set di condicion.

Pa PPA esaki ta inaceptabel y nos ta lamenta cu nos gobierno di MEPORED y nos Ministro Presidente no ta duna indicacion firme unda e ta para mientras Hulanda ta para cu e demanda asina.

PPA ta lamenta esaki y ta bisa un bes mas despues di un racha di ‘eror historico’ nos no ta mira un maneho firme di parti di nos actual gobierno ainda.

PPA kier ta cla tambe. Mirando cu AVP a goberna nos pais pa 8 aña y cu a laga nos cu un herencia di un MEGA DEBE, nos a y ta sostene gab Wever Croes pa goberna nos pais pa e periodo di 4 aña completo.

Sin embargo PPA lo critica for di bankinan di oposicion pafor di parlamento ora nos nota ‘erornan historico’ y menos bon gobernacion di e gobierno di MEPORED tambe, esun cu no gusta keda sin gusta pero PPA lo sirbi nos pais segun nos di PPA sinti cu e situacion ta demanda.

Finalmente Statuut di Reino ta papia den articulo 36 di Cooperacion, ayudo y sosten’ ningun momento di abuso, condicion y hasta e sentimento di ta bek na un West Indische Companjie. Het kan anders met respect voor Aruba en de andere landen binnen het koninkrijk. Steunend op eigen kracht doch met de wil elkander bij te staan!

Conclusion di PPA

Mientras cu Min Pres a informa pueblo cu e DOS RIJKSWET Hulandes tabata un sorpresa desagradabel p’e, a resulta cu Min Pres tabata na altura desde mei ultimo cu esaki tabata na caminda pero Ee no a informa ningun gremio ni partidonan politico te ora cu e tabata lomba contra muraya.

2. E dos rijkswet/ley di Reino ta indica claramente cu Hulanda No tin e minimo confianza mas den gabinete Wever Croes, a pesar cu staatssecretaris Knops lo haci expresionnan ta tene Min Pres contento por lo pronto te ora E logra haya Aruba unda Ee kier e, casi estilo di un colonia, 100 aña atras.
3.No por compara e Entidad nobo cu FDA di pasado pasobra FDA hamas por a tuma over cierto podernan den Justitie, Reformacion Economico, Enseñansa, infrastructura y Cuido…(lesa prensa Hulandes etc!).

4. Entrega di nos Status Aparte/autonomia ainda mas ta dilanti porta, miho esnan cu ta kere den esaki sea ALERTA e dianan aki.

5. PPA ta di opinion cu Statuut ta obliga gobierno Hulandes pa juda y cu esaki lo cumpli debidamente pa esaki pasobra Hulanda no por permiti e islanan den Caribe incluso Aruba pa ‘krepeer’ y Hulanda no por permiti pa for di su colega paisnan den Reino sali delegacionnan rumbo diferente instancia Internacional.

Te aki por lo pronto di parti di partido PPA.