Den curso di tempo  San Nicolas a wordo a ricibi varios titulo/nomber nos a conoce   ‘Sunrise city’,  Chocolate city y  nos ciudad Caribense esta  ‘Our Caribbean City’.

Tin un grupo di ciudadano cu ta kere  den un mas cu otro.

Nos por a tuma nota  cu Ministro Dangui Oduber a publica cu  Gobierno pa medio di ATA lo bay haci mercadeo pa San Nicolas como nos  ‘Sunrise City’.

Por a tuma nota caba di publicacionnan na unda e titulo aki ta wordo uza mientras cu  No tabata tin ningun discusion cu e pueblo di San Nicolas pa mira kico ta biba mas den nos pueblo. Uzo di un nomber of titulo lo mester bisa algo di e pueblo  mes cu ta biba den e districto aki segun opinion humilde di PPA y cu lo por tin un impacto economico pa e pueblo encuestion si uza un cierto nomber.

Sunrise City:
Ta un realidad cu e parti  pa ariba di tur Isla den Caribe dependiente naturalmente con e Isla ta situa den nos lama Caribense  lo ta e parti unda e solo ta lanta diariamente y como tal tur isla den Caribe lo por tin un parti di nan isla cu por wordo yama ‘Sunrise side of Sunrise city”.

E straño ta cu e  solo ta baha parti pabou di nos Isla pero nos no ta tende  cu cualkier parti sea Oranjestad of parti di Noord wordo cualifica como ‘Sunset City’ ?

Kico ta e argumentacion o e historia cu lo mester uza ‘Sunrise City’ y kiko e tin di haber cu e historia di e pueblo cu ta habita parti pariba di nos Isla?

Chocolate City:
Diripiente  algun decada atras e nomber of titulo di  ‘chocolate city’ a lanta…. Y a wordo ricibi cu sentimento mixto.

Mientras cu un parti di pueblo di San Nicolas a tuma e  nomber aki cu poco silencio un otro parti a considera e nomber aki como  un nomber cu cierto racismo o discriminacion como cu esaki lo tin di haber cu e  color di rasa di un gran parti di e pueblo di pariba y a rechasa e nomber aki sea den silencio of cu cierto forsa.

Cu tempo e uzo di e nomber ‘chocolate city’ a disparce mes  silencioso cu el a aparece.

Nos ciudad Caribense /our Caribbean town!!
Un titulo of nomber cu a wordo uza tambe pa den curso di hopi decada ta e  nomber ‘San Nicolas nos ciudad Caribense of San Nicolas Our Caribbean Town,.

PPA tambe den curso di tempo a tuma over e  titulo/nomber aki y a duna tanto nos programa dedica na San Nicolas  e nomber aki p.e. Agenda for ‘San Nicolas, Our Caribbean Town!!

PPA su argumentacion pakico e titulo aki  tin mas impacto ta basa riba e historia di e pueblo di San Nicolas.

San Nicolas cu tabata un districto  unda tabata tin algun famia cu tabata biba di  pesca, cria y agricultura.

Di aña 1876 pa 1914  San Nicolas na haya un importancia  door di e establecimento di e phosphaat pa medio di un compania di Gran Britania cu a establece su mes y a  coba, trece ariba y bende phosphaat pa e periodo di 40 aña.

Ta door di e  desaroyo aki a bini un 60 trahado di e Islanan Corsou y Bonaire  y un cantidad di trahado di paisnan cu awe nos por considera Europeo.

E epoca aki Aruba a bira  e ‘baca di lechi’ di e Islanan cu tabata forma ‘Curaçao en onderhorigheden’ y San Nicolas a hunga e rol importante aki.

Na 1920 a inicia e inversion pa inicia cu un Bunkerstatation  na a wordo sigui den algun aña pa un Refineria LAGO/EXXON . Y door di e desaroyo aki miles y miles di trahado a bini di islanan den Caribe pero tambe  di Sur America pa traha den e refineria aki. Gran mayoria a establece nan mes rond di e refineria den San Nicolas.

Diferente decada largo e presencia di  un cantidad grandi e famia Caribense a larga su stempel na San Nicolas y na Aruba.

Nan contribucion na  nos Cultura di awe ta grandi cu e  fiesta cu a bira nos fiesta nacional esta nos Carnaval  cu nos Calypso y Soca pero tambe e epoca di ‘steelband’ cu Aruba/San Nicolas a conoce.

Nan contribucion den e ‘cuisine Caribense’ cu a hunga un rol grandi y por hunga un rol mas grandi si e wordo bon stimula esta e combinacion di cuminda tipico y cuminda Caribense.

E presencia keto bay di un gran cantidad di descendiente di e famianan di Caribe na San Nicolas ta un hecho cu por wordo uza positivamente.

Ta den e cuadra aki PPA ta considera cu  e nomber/titulo mas positivo cu lo tin un impacto grandi lo ta pa uza ta  e nomber di ‘San Nicolas Our Caribbean Town’.

‘San Nicolas Our Caribbean Town ‘ lo tin un  impacto sumamente grandi y positivo si esaki wordo uza pa mercadea San Nicolas.

Ta p’esey PPA tabata e prome partido cu a presenta e idea di un  Carnaval Plaza combina Museum na San Nicolas!!

Pasobra esaki  ta un realidad den historia di San Nicolas y di Aruba!!

Caribe tin un Mercado grandi cu por wordo mercadia pa bishita Aruba y San Nicolas si esaki wordo bon prepara dunando San Nicolas e infrastructura necesario pa esaki.  Ta den e cuadra aki PPA a presenta e idea di un Museo Historico dedica na historia di San Nicolas…..cu e epoca di SN como districto cu ta depende di pesca, cria y cunukero bon presenta  sigui pa e epoca 1876 pa 1914 e epoca di phosphaat y seguidamente e epoca di refineria LAGO, Coastal, El Paso, Valero etc.….

Un otro sector cu por wordo bon utilisa y sosteni ta e sector di e ‘Cuisine Caribense’ cu hunto cu nos cuminda crioyo/local bon presenta por bira un atraccion parti pariba di nos Isla.

P’esey PPA ta lamenta e uzo di ‘Sunrise city’ cu tur respet pa esunnan cu ta kere den e uzo aki  pero e impacto di esaki lo ta limita y no ta refleha o no tin laso cu e pueblo di San Nicolas mes.  Berdad solo ta sali parti pariba pero nos ta ripiti si esaki ta asina impactante con bin no a tende nunca  ‘Sunset city’ pa Oranjestad of Noord ??

PPA  ta keda di opinion cu si realmente kier mercadea San Nicolas basa riba su historia y su pueblo e  uzo mas impactante lo keda ‘San Nicolas Our Caribbean Town’  esaki lo  pusha e turista pa bishita e  ‘Caribean Town’ aki pa nan por sinti e sabor Caribense combina Arubiano  den tur sentido di palabra.

PPA a yega di presenta un mocion añanan atras den parlamento na unda nos a pidi pa un ‘budget’ cu e meta pa  mercadea San Nicolas tanto local como Internacional. Lastima e unico partido/fraccion cu e tempo ey a vota contra tabata  fraccion di MEP den parlamento. Nos ta spera cu e posicion negativo aki lo a cambia den curso di tempo y cu e fraccion di MEP  y nos gobierno actual lo ta dispuesto di mercadea San Nicolas na un forma abrumador.

E uzo di e titulo di  ‘Sunrise City’ parce cu  e actual gobierno lo no kier reconoce e epoca  unda e hendenan di Caribe a pone nan stempel na forma positivo na San Nicolas y Aruba.

PPA lo bin bek riba e materia aki den futuro cercano.