Despues cu porfin bou di gobernacion di AVP nan a ehecuta e vision di PPA di 93/94 unda como Ministro di Transporte y Comunicacion mi a laga un estudio wordo traha dor di ECT ‘Europe Container Terminal’ pa muda  Containerhaven for di Oranjestad pa Barcadera ‘wowo’ a cuminsa cay riba e tereno cu a keda liber. Por considera e tereno aki e tereno di mas balor riba nos isla cu lo mester wordo uza pa un desaroyo di balor economico formal.

Ora cu como consecuencia di e  acuerdo entre APA NV y Port of Amsterdam bou di gobierno anterior a dicidi pa desaroyo un asina yama ‘Port City’ un di e prome ponencia fuerte di e gobierno anterior tabata cu lo mester tin un desaroyo cu lo no crea simplemente competencia pa  centro di Oranjestad of miho bisa caya grandi y vecindario !

Mientras tanto gab. Wever Croes a dicidi pa permiti cu e  vision di gab Eman(AVP) continua cu algun supuesto adaptacion chikito!

E esencia di e ‘Port City’ aki ta wordo splica o mercadea como lo siguiente:

‘Port City lo actua como un magnet pa residentenan y turistanan cu boutique hotels, casnan residencial, oficina, facilidadnan di parkeo, beach, hotel, café, bar, restaurantnan y shops.  E plan aki tambe lo bay envolvi un ‘Water Front Park Publico’ entre e terminal di crucero y Bushiri Beach.

Tambe ta notabel cu den curso di tempo tabata papia di un proyecto cu lo a wordo ehecuta den 10 pa 15 aña awe ta wordo splica como 15 pa 20 aña.

PPA ta di opinion cu e escogencia pa un ‘Port City’ ta locual nos por cualifica como

‘the easy way out’ y e definicion of contenido di e posibel proyecto ta hustamente empugna cu e prome ponencia fuera ‘ cu e lo no mag di ta un competencia pa centro di Oranjestad cu ta cay Gilberto Francois ‘Betico’ Croes y cercania.

Si nos tene cuenta cu  comercio di Aruba den e parti aki ta sufriendo consecuencia di varios desaroyo y maneho di ultimo aña anto tur instancia cu tin interes den e parti aki lo tin derecho di cuestiona e  contenido di e posibel ‘Port City’ aki.

Ta bon conoci cu un di e poco alternativa pa duna  caya Gilberto Francois ‘Betico’ Croes bida lo ta pa permiti desaroyo di dos of tres  ‘boutique hotels’ den e caya aki y pa stimula inversion den e edificionan comercial cu lo por hala atencion di tanto local como bishitante.

Un pregunta cardinal cu PPA tin pa gobierno ta  si e desaroyo di un Port City na unda ta bay permiti desaroyo di e.o.  Boutique Hotels y posiblemente Hotel na unda lo bay permiti desaroyo comercial door di permiti inversion den Café, Bar y Restaurantnan y Shops esta pacus  etc.…….no ta hustifica e pregunta cu e Port City ta nifica simplemente move centro comercial di Oranjestad for di Caya Gilbert Francois ‘Betico’ Croes pa ‘Port City’ ???

Cu e desaroyo  di un infrastructura  moderno manera un parke publico, un  Water Front Park Publico y facilidad di parkeo lo no facilita e consumidor y bishitante mas cu Caya Gilberto Francois ‘Betico’ Croes actualmente??

World Trade Center !!

Ta bon conoci cu PPA a proyecta pa aña construccion di un World Trade Center  combina Convention & Business Center combina cu DOS business hotels primeramente na otro sitio pero despues cu a muda  Containerhaven pa Barcadera PPA a proyecta e World Trade Center/Convention Center riba e sitio cu a bini liber aki. Tambe PPA a expande nos vision  cu construccion di un edificio ‘extra’ cu lo bira un posibel Universidad Internacional na unda tur lo ta acopla na otro.

PPA a proyecta posibel contenido di un World Trade Center  y a compara esaki cu e World Trade Center na cual tambe ta den un pais chikito di 33.000 habitante unda PPA a mustra cu e World Trade Center a crea trabou pa  1500 hende y a crea un entrada pa e pais aki y Gran Bretania di 160 milon pounds den su prome y di dos aña di funcionamento.

PPA ta lamenta cu gobierno y APA Nv no a dedica atencion na e  alternativa serio aki cu na opinion di PPA lo bira un Segundo of di tres pilar economico pa nos Isla  unda Aruba lo participa den duna ‘servicio na Internaticional Trade’.

PPA a tuma nota si cu gab. Wever Croes a dedica atencion parcialmente na e vision di PPA ora cu a larga un compania di Europa (Suisa) bin duna un presentacion di un eventual  Convention Center riba of den e Port City.

PPA  ta di opinion cu  Gab Wever Croes lo mester para of frena desaroyo di e ‘Port City’   pa asina analisa e posibel consecuencia di un Port City pa cu Oranjestad nos Capital di Aruba y aki PPA ta referi na  Centro di Oranjestad, Caya Gilbert Francois Betico Croes y vecindario cu lo mester keda e centro di desaroyo comercial/turistico riba nos Isla.

Port city un proyecto di ‘real estate’ anto un gated community??

Un otro punto cu PPA ta cuestiona ta lo siguiente:

Den curso di  ultimo decada varios pais a dicidi pa desaroya un ‘Port City’  pero ora cu a dicidi esaki nan a pone accento ariba e ciudad ‘completo’  y no solamente un pida di dje.  Tambe nan a scoge pa pone accento riba un  ‘Smart Port City’ cu ta encera reconstruccion y re-modelacion di e ciudad completo sin afecta e aspectonan historico/Antiguo  di e ciudad.

Con bin ora a scoge pa desaroya un ‘Port City’ NO a scoge pa desaroya  Oranjestad den su totalidad na luga di solamente e tereno cu ta bin liber ?? Naturalmente algo asina lo mester cay bou di DOW/APA NV !!

Importante di e pensamento ta  cu ora papia di Oranjestad nos capital lo mester ta papia di un ciudad  integra den otro.

Y no un desaroyo cu den futuro lo por wordo categorisa como un parti di e ciudad nobo y un parti di e ciudad bieu…..PPA no ta kere cu algo asina lo ta na interes  comercial di Oranjestad!!

Den pasado un ministro cu awe no t’ey mas a cualifica ‘Port City’ como un ‘gated community’ Kico ta berdad pa cu e  cualificacion aki ? y si acaso esaki ta berdad lo e nifica cu no ta papia di ‘integracion’ di un capital Oranjestad ??

Un ‘gated community’ lo nifica cu pueblo consumidor lo no por drenta sali manera nan desea y cu mayoria infrastructura lo ta na beneficio di esunnan di exterior cu cumpra apartamento etc. eynan. Cu otro palabra  e proyecto aki lo por wordo categorisa como un proyecto di ‘real estate’ ??

PPA ta considera cu no a yega e momento pa inicia cu ehecucion di e proyecto aki ainda pasobra  simplemente APA NV y Ministro encarga cu APA NV NO a duna pueblo di Aruba suficiente informacion ainda.

Haf di Oranjestad  y desaroyo di Cruise-Tourism!!

PPA no por kita e impresion cu  No tin suficiente atencion pa e curason di e tarea  di APA NV cu lo mester ta ‘zorg’ pa desaroyo di e haf di Oranjestad y Barcadera.  Awor kedando na Oranjestad PPA ta di opinion cu lo mester presenta na pueblo un proyecto di inversion di APA NV den expansion di e sitionan pa  ‘Cruise ships’ por para den haf di Oranjestad.

Mirando e desaroyo positivo di nos ‘Cruise-tourism’ cu a logra algo mas cu 800.000 turista  PPA ta di opinion cu atencion mayor mester wordo duna na expansion di e sitionan pa barco Crucero por  para cu minimalmente 2 posiblemente tres sitio mas………Con ta para cu un proyecto asina ???

PPA ta spera cu Ministro Dangui Oduber duna pueblo informacion al respecto.

Cu respet pa  director y staf di APA NV y nos Ministro  PPA ta spera cu nos opinion lo haya e atencion necesario.