Eleccion ta encera presenta vision, maneho y programa y ekipo di candidato na pueblo pa aprobacion!
Democracia di pais Aruba ta basa riba e hecho cu cada cuatro aña tin eleccion of ora cu gobierno yama eleccionnan trempan.
Esaki ta duna partido politico oportunidad pa presenta nan programa y nan team di candidato na pueblo pa por ricibi participacion den e plataforma constitucional di representacion esta Staten di Aruba!
E ta crea e oportunidad pa partido politico sea busca aprobacion pa continua cu un maneho basa riba nan vision, maneho y masterplan of esnan den oposicion pa presenta pueblo nan vision, posibel maneho y masterplan.
PPA a tuma nota cu gabinete Wever Croes ta gaba cu nan a laga traha un Masterplan economico cu participacion di 138 ciudadano/profesional cu lo bay conta pa 3 aña mientras cu e periodo di e actual gobierno cu falta ta apenas un aña.
Un eleccion ta duna TUR partido oportunidad di trece cambio den maneho naturalmente pa cierto desaroyo/inversion lo mester existi ‘siguridad legal’ (rechtszekerheid) esta pa continuidad di gobernacion pero esey no ta trece cunele cu un Gobierno nobo of restructura lo no por presenta un programa otro cu e gobernacion actual.
Kico ta pasa si ningun di e partidonan den gobierno awe logra regresa of participa den e proximo gobernacion di pais Aruba? Esaki lo nifica cu grandemente e Masterplan y/of maneho di e gobierno lo a wordo rechasa pa pueblo.
Ta parce PPA antidemocratico pa mara otro partido cu a ricibi un otro mandato di pueblo na un programa di gobernacion unda nan no tin arte ni parte.
Pasobra pueblo por a tuma nota cu a pesar cu 138 ciudadano lo por a participa pero hecho ta cu gabinete Wever Croes no a duna ningun partido den oposicion un oportunidad pa presenta nan vision y of contribucion na e Masterplan y sigur no a wordo aproba pa oposicion……Ni oposicion representa den parlamento lo no a ricibi oportunidad pa duna un contribucion. Ta con ta pretende cu tur otro lo ta mara na e ‘masterplan’ aki…..Hopi antidemocratico mes segun opinion di PPA.
Pa evita un desaroyo asina nos actual gobierno mester a permiti participacion di tur partido politico den e proceso di crea un Masterplan Economico!
Esaki lamentablemente no a sosode cual por wordo considera un ‘eror serio’ mirando e crisis financiero economico y COVID 19 di parti di nos actual gobierno.
PPA ta di opinion cu nos democracia mester wordo respeta y e principio(nan) di nos sistema democratico ta encera:
- Eleccion cada cuatro aña!
- Partidonan politico ta haya oportunidad pa presenta vision y programa durante eleccion pa pueblo por husga.
- Participacion den gobierno cu un Vision/programa mester duna oportunidad pa gobierno adapta su maneho pero teniendo cuenta cu ‘siguridad legal’!
- Leynan nobo cu ta bay regla eleccion di pais Aruba of cualkier aspecto di djele no por wordo trata ni acepta den Staten SIN participacion real di tur partido politico existente na e proceso specifico aki! (esnan representa den Staten y esnan no representa den staten tur den derecho di duna nan opinion y contribucion na un ley asina!)
En todo caso un democracia bibo No por encera cu partido politico ta mara na un Masterplan economico unda nan no tabatin participacion den ningun forma.
PPA ta spera cu nos gobierno como nos Staten tene debidamente cuenta cu e principionan di nos sistema democratico cu Aruba a conoce desde no solamente nos periodo di Status Aparte cu ta 34 aña pero hasta e periodo cu Aruba tabata un teritorio insular (eilandgebied) cu autonomia substancial.
Un eleccion tabata nifica semper oportunidad pa presenta programa y ekipo pa despues ricibi e bendicion di pueblo pa medio di un eleccion pa ehecuta e programa cu naturalmente den caso di un coalicion ta nifica un negociacion pa yega na un programa di gobernacion cu e coalicion formando e siguiente eleccion lo ehecuta.
Esaki segun opinion di PPA no mester wordo cambia na ningun momento.
PPA ta haci un apelacion riba tanto gabinete Wever Croes como parlamento pa respeta e principionan cu a guia democracia Arubano den curso di tempo.
