No kabe duda cu siman pasa tabata un siman hopi interesante!!

Iniciando cu  e discurso di nos Gobernador Alphonso Boekhoudt den Staten di Aruba y su declaracion di nos di  e aña parlamentario 2019 -2020 ! Esaki a sigui cu e ‘strike’ di nos Cuerpo di Douane despues cu Gabinete Wever Croes a  nenga di sigui ehecuta un acuerdo entre Gabinete Eman y Duana na 2017 cu a causa un decepcion y rabia forma den e Cuerpo di Duana. 

Tambe e retiro di director di RDA  y e declaracion di Ministro Presidente Evelyne Wever Croes cu e director a logra pasele un ‘fastball’, pidiendo pa keda cu su computer pa despues kita tur informacion a causa decepcion y rabia den nos comunidad.  Y tur otro informacion rond di RDA a hisa e malcontento den nos comunidad !!

Esunnan cu ta corda  declaracion di PPA tabata ‘cuidou cu e rechaso di e acuerdo cu a causa e ‘strike’ di  Duana no ‘trigger/causa’ cu mas grupo dicidi basa riba malcontento di bay den accion tambe.

Esaki a wordo sigui cu e accion di  departamento di recherche cu tabata sinti cu nan tabata cu 13 recherche den un  camber cu normalmente lo ta pa 4 of 5 persona…….!!

Si esaki no tabata suficiente……trahadonan di Serlimar a dicidi di bay den accion pasobra nan a cuminsa sinti cu nan futuro lo tabata den peliger y a dicidi di bay den accion dilanti di Conseho di Ministro.

Diabierna 13 di September  ‘Friday the 13th’ tabata un diabierna sumamente turbulento pa Conseho di Ministro y pa  parlamento di Aruba como cu Meta Corporation a bin manifesta cu un fila di trucknan, staf y personal di tur nan  negoshinan dilanti di parlamento como protesta contra di un concepto di Ley cu a wordo entrega na parlamento pa tratamento…..!

Pa no lubida  nos maestro y nan sindicato cu tambe a dicidi di haci uzo di nan derecho di manifesta y entrega un carta na tanto Conseho di Ministro y Parlamento y por a tuma nota di un fenomeno nobo unda  e ‘veld di maestro’ aparentemente ta pidiendo gab Wever Croes pa baha nan ministro di Enseñansa dr Rudy Lampe pa motibo di un maneho cu a wordo cualifica como ‘ad hoc’. Mester anota cu e demanda pa Ministro Rudy Lampe wordo baha ta un fenomeno nobo den politica Arubano como cu constitucionalmente  Ministronan ta wordo nombra y baha pa parlamento di Aruba. Pero e ta demostra un malcontento enorme den veld di Enseñansa si!

Y pa pone e ‘cherry’ riba e bolo diasabra un delegacion di representante di Taxi a bishita Conseho di Ministro  pasobra nan tambe ta malcontento cu e maneho di ministro Chris Romero cu lo kier tuma cierto decision sin envolvi representacion di Taxista…..

PPA no ta kere cu nos por keda sin menciona e reunionnan cu gobierno tabata tin cu gremionan comercial cual tambe a laga gremionan comercial malcontento !!

Mas protesta na caminda ?
Tur e desaroyo aki y ainda mas cu PPA ta tende ta  ‘brouw’ den nos sociedad y lo por conduci na ainda mas demostracion y protesta ta demostra un  malcontento enorme pa cu e maneho y e resultadonan cu a wordo hiba/logra of no door di nos actual gobierno.

  1. Un gobierno(partidonan) cu a priminti di ta forma pa 7 ministro y tin 8 ministro!!
  2. Un gobierno (partidonan)cu a priminti di tin 15  trahado/coordinador pa cada ministro pero cu tin  of ta permiti 25 pa cada ministro!!
  3. Un gobierno(partidonan)  cu a priminti un gobernacion sin medida pero practicamente ta bibando di medida so !!
  4. Un gobierno cu a priminti pa biaha menos pero cu ta mas den exterior cu nan ta na Aruba pa soluciona problema.
  5. Un gobierno cu e pueblo ta buscando nan ministro pa combersa cu nan y nan ta mas den exterior y pueblo ta wordo manda pa combersa cu ‘coordinador’ na luga di ministro !!
  6. Un gobierno/partidonan cu a  priminti pueblo cu nan tin Vision, proyecto etc. y cu asina nan sinta pa goberna pueblo lo mira un desaroyo di otro mundo…te awe  nada of masha poco.

E proyectonan mas grandi  manera JFK su reconstruccion,  Vison 2030 na aeropuerto,  Port City na x Free Zone y e  Clinica Rudy Engelbrecht na San Nicolas cu sea a cuminsa ta di e gobierno anterior di AVP y claro nos pueblo cu su derecho ta puntra …Unda e vision, proyectonan di e actual gobierno ta ?

E proyecto cu mas lo tin impacto positivo lo ta e ‘Hotel Secrets na Seroe Colorado’ cual PPA ta sostene.

Hunto cu nos pueblo  PPA a desea cambio, seriedad den gobernacion y un maneho dinamico cu lo por eleva nos economia y nivel di bida di nos pueblo.  Pero un maneho basa riba ‘medida’ so cu ta hisa e presion riba nos pueblo ….esaki PPA hunto cu nos pueblo ta rechasa!

E storia of defensa di gab Wever Croes y su defensornan cu ta bon scoge pa referi na pasado esta e gobierno anterior tambe mester wordo rechasa.  Pueblo a castiga y rechasa e gobierno anterior pa mal maneho caba !! E gobierno actual forma pa MEP, POR y RED a ricibi e confiansa di pueblo pa bay soluciona tur e problemanan cu tin.  Pueblo e pone nan confiansa den e tres partidonan aki.

Ta nan mester presenta Vision,  proyecto y solucion pa e problemanan. Sconde of bo mustra na ‘mal maneho’  di pasado no por mas of mester ta minimal pasobra ABO ….MEPORED a wordo eligi pa soluciona esaki y sconde tras di kico bo hereda no ta yuda awe mas…..goberna nos pais basa riba  e principionan di ‘bon gobernacion basa riba bo vision y carga e responsabilidad pa esaki.

PPA  un di e perdedonan di e ultimo eleccion ta respeta decision di pueblo y ta duna nos actual gobierno e ‘beneficio di duda’ hibando un oposicion pafo di parlamento relativamente suave pa asina duna espacio pa nos gobierno por goberna y soluciona e problemanan sin pone mas medida riba lomba di pueblo!!

Lamentablemente tur e desaroyo aki ta demostra cu nos gobierno ta cometiendo  bastante eror….. No por ta cu asina hopi grupo ta bin protesta y gobierno of parlamento lo no a kibra un copi.

Hulanda su ‘deadline’ !
Pa colmo nos a drenta e siman  unda e gab Wever Croes tin un ‘deadline’ di Hulanda pa nan cumpli cu nan protocol cu nan a jega na djele na November 2018 cu pa colmo a wordo sigui pa un ‘amienda di desconfianza’  di fraccion MEPORED contra nan propio gobierno den parlamento di Aruba !! Pa regla constitucional y politica Gabinete Wever Croes mester a baha dia 6 di juni 2019 !! Pero nan a haci manera nan nanishi ta sangra.

Hulanda ta demanda cu mester baha  gasto substancialmente of hisa entrada  cual ta nifica e.o. medida riba lomba di pueblo.

PPA ta lamenta cu di ‘day one’ nos gobierno nobo a comete algun eror hopi serio  pa cual nos pueblo tin di carga dolor hunto cu e dolor y medidanan di e gobierno anterior.

PPA no ta kere cu un maneho di medida lo yuda nos pueblo sali for di su debenan…..PPA ta kere fielmente den un maneho economico serio  cu mester por ‘diversifica’ nos economia.

PPA ta haci un apelacion na Gab  Wever Croes pa nan sinta den nan coalicion cu analisa unda nan a comete algun eror hopi serio !! Ta solamente door di reconoce bo eror bo lo por drecha…’

PPA ta sigui duna nos gobierno e beneficio di duda sinembargo  PPA lo aumenta nos oposicion di pafo di parlamento.