Diversifica nos economia… ta un grito cu por tende di varios skina den nos comunidad. PPA tambe den nos vision economico ta menciona un maneho dirigi riba e meta aki esta diversifica nos economia.. PPA ta kere den diversifica nos economia, pero tambe PPA ta kere den diversifica nos producto turistico!

Lastima nos gobierno Wever-Croes a tuma un aña mei (18 luna) pa publica nan vision economico cu ta encera un maneho unda nan a señala 6 sector cu nan lo dedica atencion y duna sosten na su desaroyo. Kico e atencion y e sosten lo ta, nos ainda no a comprende debidamente.

Na mes momento mester anota si cu despues di e 1 aña y 6 luna gobierno/Ministro di Economia a presenta un documento relativamente bon cu e vision y maneho di nos gobierno. Ta nos opinion cu dentro di un crisis financiero cu Aruba ta aden, cu e maneho economico mester a ricibi prioridad for di e prome dia di gobernacion.

PPA ta di opinion cu tabata un eror pa e pone economia hunto cu finanzas bou di e mesun Ministerio, cu tur respet pa esun cu tin e Ministerio actual.

Pasado a demostra cu Finanzas ta exigi asina hopi tempo cu e ministro no ta dedica e tempo necesario na desaroyo di un maneho Economico.

Fuera di esey, un ministro encarga cu economia mester bay exterior periodicamente pa presenta e vision of maneho di gobierno den exterior tambe, locual nos no a tuma nota cu a sosode, cu excepcion di e biahe unda e ministro a participa/lidera un delegacion di Reino.

Segun PPA, e solucion pa e crisis financiero no ta sinta den un maneho di medida, pero den un maneho economico dinamico! Un maneho di medida lo limita e pueblo consumidor pa nan gasta placa den nos economia. Un maneho economico lo stimula nos economia.

Algun proposicion di PPA:
PPA ta di opinion cu pa hiba un maneho economico dinamico lo mester tin:

1. Un ‘Think-Tank’ di gobierno combina cu sector priva!

2. Gobierno/Ministro lo mester apunta 2 embahador economico cu ta haci e ‘footwork’ pa gobierno den exterior riba tereno economico grandemente den regionnan di mundo unda Aruba no tin representacion ( *Ta conoci cu Aruba tin representacion na Hulanda, esta Ministro Plenipotenciario y su staf na Den Haag, Representante di Aruba na Europa (Brusellas) y nos representante na Washington, DC; pero Aruba merece embahadornan economico cu ta biaha pa exterior y prepara locual PPA ta yama e ‘footwork’ economico pa e Ministro di Economia, cu na nos humilde concepto ,ta hopi mara cu e problematica/crisis financiero.

3. Despues cu e ‘footwork’ pa cierto desaroyo wordo haci riba tereno Internacional, sea e Ministro di Economia of den cierto caso e Ministro Presidente p.e. un presentacion oficial di e Vision y Maneho di nos actual gobernacion o sea e proceso di negociacion di cierto proyecto.

Varios bes PPA ta wordo confronta cu ponencia di sea politico cu ta den e partidonan cu ta forma gobierno of sea nan sostenedonan… cu e ponencia cu NO tin placa, p’esey no por tin inversion den proyecto!

PPA ta considera e ponencianan aki un falta di bista riba e pregunta ‘Con ta hiba un maneho economico dinamico?’

Un maneho economico dinamico no ta depende di e pregunta cu si un pais/isla cu gobierno tin finanzas si of no. Bo tin desaroyo cu por wordo stimula basa riba

un maneho economico basa riba cierto incentivo di gobierno. Bo tin cu masha poco inversion basta bo tin un Vision kico bo ta desea como gobierno.

Tampoco mester lubida cu hopi inversion por bin di sector priva (sea localmente of internacionalmente!); atrobe basta bo tin un vision kico realmente ta bo deseo como gobernacion.

PPA lo menciona como ehempel un Vision/Idea di PPA cu nos a menciona den nos programa pa eleccion ultimo, cu lo no a costa gobierno mucho placa, pero cu tempo den concepto di PPA lo a crea trabou tanto di construccion como trabou di nivel pa termina largo y mayoria trabou ‘bon paga’ si crea:

‘Un Education Village y un Education FreeZone!’
Na prome luga un Education Village ta un sitio unda ta solamente edificio lo bini cu tin di haber cu Enseñansa y Educacion di nos pueblo. Naturalmente esaki, segun vision di PPA, tabata tambe pa destina e edificio JFK pa Cuerpo di Polis di Oranjestad y Dakota, pero gobierno a dicidi pa mantene e idea di gobierno anterior(AVP) cu a prepara pa re-construi e edificio pa Departamento di Enseñansa.

Siguiendo riba nos vision, banda di e edificio di Enseñansa lo por a bini edificio di sector priva comercial, cu ta dedica na servicio local cu tin di haber cu Enseñansa.

Si e pueblo lo tabatin mester di algo di enseñansa, lo nan mester a bay na e Ciudad di Ensenansa Yy Educacion y eynan nan lo a haya tur cos relaciona cu esaki.

E construccion di e Ciudad ey lo a crea trabou den construccion pa por lo menos un 3 aña y segun bin mas instancia cu lo kier tabata den e ciudad lo tin mas expansion di e ciudad di Enseñansa. Pero PPA ta comprende cu e idea aki no por awor cu gobierno a continua cu vision di AVP pa JFK bay pa Departamento di Enseñansa.

Pero locual ainda si por ta:

Un Education FreeZone, cual lo ta un free zone dedica na Universidad y empresa cu lo ta desea pa ofrece Enseñansa y Educacion en general den region di Caribe, pero na Aruba y na mes momento pa empresanan cu ta ofrece servicio cu tin di haber cu Enseñansa den region, pero for di Aruba.

Na prome logra e Vision aki lo por crea un ‘brain-trust’ na Aruba mes. manera nos sa ora cu tin desaroyo negativo semper isla chikito ta perde parti di nan ‘brain’ es decir personahe bon studia cu capacidad ta bandona bo isla pa bay busca trabou den exterior. Den e caso aki, un Vision asina lo por trece/crea cupo di trabou di nivel, cual lo por conduci cu e proyectonan ta trece ‘brain’ di exterior y na mes momento crea trabou di nivel riba nos Isla. Creando cupo di trabou riba nivel lo nifica cu ‘sin medida’ Aruba lo por haya cu tin un cantidad grandi di persona cu ta contribui na ‘belasting’ di gobierno!

Awor con bo ta logra algo asina?

PPA a menciona den nos programa pa eleccion 2017 cu ta lanta un Compania di gobierno esta un NV y ta apunta un Raad van Comissarissen y un Gerencia pa ehecuta e vision aki.

1. E statutonan lo costa gobierno un suma chikito!

2 E ‘payroll’ ta p.e. 2 aña ta wordo financia pa gobierno pero despues pa nan mes.

3. Ta pasa un parti di tereno di gobierno rond di ‘Watty Vos Boulevard’ over pa e compania di gobierno como propiedad/eigendom.

4. E tereno ta wordo uza como ‘garantia’ pa e compania ricibi fondo presta di Banco /institutonan financiero pa construccion di e edificionan cu e compania scoge pa traha su mes.

5. Universidadnan cu bin di exterior y ta desea di inverti nan funcionamento riba nos Isla ta negocia un acuerdo cu e compania NV di gobierno y ta ricibi un pida tereno pa por cumpli cu nan vision. Nan lo mester paga anualmente e NV pa e tereno y ta yega na un acuerdo si nan mes lo construi e edificio of ta laga e compania di e Free Zone cumpli cu tal.

6. Otro companianan cu ta duna servicio na Universidadnan den nos region por negocia un acuerdo cu e compania Education Free Zone specifico

En corto un bes mas un idea/vision asina p.e. no ta costa gobierno mucho/minimal pero por crea
A. Basta trabou riba tereno di construccion pa hopi aña

B. Basta trabou Acadamico y di nivel pa periodo largo !!

C. Ta crea un ‘Braintrust’

D. ta crea un entrada cu tempo di belasting substancial.

E. Ta haci Aruba un ‘player’ importante den region di Caribe!!

E. E desaroyo aki bon ehecuta lo por crea un pilar economico nobo pa Aruba!!

F. Presencia di un cantidad di profesional den nos comunidad y un cantidad di studiante lo crea necesidad pa cas y apartamento cual lo crea ainda mas trabou y

entrada pa e inversionistanan local pa esaki.

Manera nos a menciona e Ciudad di Educacion lo no ta posibel mas pero e idea di un Education Free Zone dedica na Educacion y Enseñansa y nan Servicio kisas ainda por wordo utilisa.

Asina dentro di un maneho economico tin hopi idea cu no ta costa gobierno mucho inversion pero cu gobierno por jega hopi leu cu algo asina.

Igualmente esaki ta conta pa un eventual World Trade Center cu si gobierno stimula su desaroyo lo por contribui cu un grupo Internacional lo por bira interesa. Aki e vision ta pa Aruba ofrece ‘servicio’ na e mundo di International Trade.

Den un otro articulo PPA lo bay mas profundo un bes mas na e vision di un World Trade Center aki na Aruba. P’esey PPA ta convenci un Maneho Economico dinamico lo yuda Aruba sali for di su crisis financiero!