PPA a tuma nota cu un delegacion di Reino encabesa pa Rey Willem-Alexander y Reina Maxima lo ta saliendo pa un bishita oficial na India! Den e delegacion aki lo tin participacion di tres ministro Hulandes y un secretario di estado.

Fuera di e Ministro Hulandes encarga cu relacion exterior, Stef Blok, lo participa 3 ministro Hulandes mas y cada uno ta encabesa un sub delegacion. Nos ta referi na Ministro Sigrid Kaag di Comercio Exterior y Ayudo Economico; Ministro Bruno Bruines di Cuido Medico y Deporte; y Staatssecretaris Mona Keijzer di Astunonan Economico y Clima.

Meta principal di e bishita di estado y mision di comercio ta dirigi riba innovacion, awa, salud publico y agricultura. Mientras cu na e estado di Kerala, e atencion lo ta dirigi na e consultancy cu Hulanda por duna India riba tereno di ‘watermanagement’ etc.

E intencion tambe ta cu despues di e bishita na India, Rey Willem-Alexander ta wordo spera tambe na Hapon dia 22 di october proximo, pa e ceremonia oficial di coronacion di emperador nobo di Hapon, Emperador Naruhito.

PPA ta di opinion cu esaki tabata un oportunidad unico pa nos ministro encarga cu Economia di Aruba, sra. Xiomara Ruiz-Maduro of su reemplasante por a participa cu un delegacion chikito (cu por a consisti di dos experto di gobierno, 2 representante di sector priva y 1 experto representando comunidad India di Aruba!) pero lastima cu aparentemente Aruba a laga un oportunidad asina importante pasa nos.

PPA ta consciente cu Ruiz-Maduro su presencia lo ta rekeri na Aruba tambe, mirando e hecho cu tin un ‘aanwijzing’ riba agenda di Conseho di Ministro diabierna awo (cu aparentemente ta un deadline di Conseho di Reino) y cu Ruiz-Maduro pues ta encarga alabes cu Finanzas y consecuentemente nos Mega Debe.

P’esey PPA a considera cu tabata un eror grave y historico pa durante formacion di gobierno ultimo den un periodo di un crisis financiero formal pa acopla Finanzas y Economia bou di e mesun Ministerio. Esaki cu tur respet pa e persona cu por ta ocupa e Ministerio actualmente!

PPA a declara ripitido bes cu un maneho financiero basa riba medida so lo no saca Aruba for di e crisis financiero y e Mega Debe. E contesta con pa soluciona esaki ta sinta den un maneho ‘economico dinamico’ pa cual e mandatario encarga lo mester tin tur espacio posibel pa e por ‘trek’ e desaroyo aki debidamente.

E acoplacion aki mes a causa cu a dura 1 aña y mei pa gabinete Wever-Croes presenta nan maneho economico debidamente, algo cu bou otro gobernacion tabata wordo presenta sea na e presentacion di e programa di gobernacion o dentro di 100 dia.

Cu tur respet, PPA ta considera e bishita di un delegacion di Reino pa India y Hapon un oportunidad perdi pa Aruba por a presenta su mes como Isla chikito den Caribe cu un vision enorme pa sirbi comercio Internacional como un HUB den futuro y e vision aki lo a hustifica presencia di Aruba den e delegacion aki.

PPA ta keda para riba cu un maneho financiero basa riba medida lo no saca nos pais for di e crisis financiero, e lo haci solamente e ‘budget familiar’ bira mas dificil pa hopi den nos sociedad. E contesta pa un bon futuro mester wordo busca den un vision cla riba tereno economico cu un maneho dinamico economico pa logra esaki y esey lamentablemente PPA no ta mira ainda.’

E falta di experiencia nos por a tuma nota di dje claramente durante e ultimo conferencia di prensa di gobierno, durante cual nos Prome Ministro Evelyn Wever-Croes a presenta e informacion cu Gobierno di Aruba a caba di yega na un Memorandum of Understanding cu CITGO/PDVSA, y cu Aruba door di esaki a haya e ‘yabi’ bek pa e refineria y e haf. Na prome luga, bo no ta presenta un acuerdo/MoOU mientras cu e no ta firma!

Den menos di 24 ora a bin e noticia cu CITGO Petroleum a manda pa media internacional y nan trahado na Aruba, cu tabata bisa algo completamente otro cu e informacion di Ministro Presidente na pueblo.

CITGO a informa cu nan a yega na un entendimento pa entrega e refineria y haf pa un periodo y cu ora cu e proceso democratico na Venezuela lo ta riba bon caminda nan lo tuma esaki bek, demostrando cu ambos partido ta leu di otro pa por papia di un comprendemento/understanding.

Durante splicacion di e materia aki, Wever-Croes por fin a declara cu solucion di e crisis financiero no ta den medida pero den un maneho economico dinamico! Por Fin! Awor mester demostra esaki tambe cu maneho dinamico economico!

Y door di keda sin participa den delegacion di Reino na pais manera India, Aruba ta keda leu di ta demostra di ta en busca di solucion economico!

PPA a declara na varios ocasion y a propone pa gobierno tambe nombra algun embahador economico cu ta biaha en busca pa solucion y alternativa economico. Nos idea ta keda riba mesa, pasobra lamentablemente awo cu e gabinete aki ta bay cumpli 2 aña di existencia y lo mester evalua kico nan a logra en general y kico nan a logra specificamente riba tereno economico …cu tur respet e resultado ta masha masha marginal.

Naturalmente ta keda e pregunta si Aruba a wordo invita pa Reino pa evalua participacion y Aruba a gradici (lo ta un blunder enorme!) of cu Aruba no a wordo invita y no a wordo poni na altura pa nan Gev Min na Den Haag cu un delegacion di e caliber lo tabata saliente direccion pa India? Aruba eventualmente por a participa cu tin interes di participa.

Naturalmente no ta den tur delegacion di Reino Aruba mester y por ta presenta, pero na e momento aki di crisis financiero y economico y cu Aruba ta en busca di alternativa serio un bishita na un pais creciente economicamente den mundo, manera India, hamas Aruba mester a perde! Naturalmente e preparacion pa participa y e ‘follow up’ riba e contactonan haci semper ta importante pa por concretisa cualkier vision, idea of proyecto!