E beneficionan financiero economico ta e punto principal di gobierno y tambe hopi parlamentario pa mustra e importancia di habri e refineria bek na San Nicolas. Menos atencion tin pa e aspecto medio ambiental.
Esaki por conclui despues e debate ayera a cuminsa den parlamento riba e ley encuanto e traspaso di e propiedad di e refineria y e lease cu e operador Citgo. E prome tanda a termina algo despues di 10’or di anochi, unda cu e parlamentarionan na palabra a termina den prome tanda, lagando continuacion pa awe mainta 10’or y mey. Na turno lo ta e ministro(nan) pa contesta den prome tanda, pa despues trata segunda tanda probablemente tambe awe.
Parlamentario independiente Marisol Lopez Tromp y lider di fraccion PDR Andin Bikker mas tanto tabata mustra e atencion pa e aspectonan ambiental.
Di e fraccion PDR a bin un amienda pa cambia articulo 15 di e ley pa e decreto encuanto e regimen special di Hinderverordening pa e refineria bin parlamento pa dos siman prome cu e bin na vigor. Tambe el a cuestiona e asunto di e acuerdo pa crea un ‘landfill’ riba tereno di refineria, sin cu tin un claridad riba kico ta ser deposita den esaki. Esey ta importante na su opinion pasobra ta comenta cu un upgrader ta produci mas desperdicio cu un refineria.
No ta sostenibel
Sra. Lopez Tromp a expresa di tin problema serio cu e deal cu e dos companianan. Esaki basicamente cu e argumento tambe cu e reapertura no tabata riba programa di ningun partido na 2013. El a recorda cu Prome Ministro a bay eleccion cu e idea pa bay den direccion di ‘green’, di desaroyo sostenibel. Den su opinion, e ley ta mara nos pero tambe futuro generacionnan, pues mester wak e bon pasobra e no ta solamente pa un aña.
Tambe el a haci un comparacion cu e atencion y energia cu a dedica na e amienda encuanto e derechonan di pareha di mesun sexo algun tempo atras, mientras awor un ley di importancia transcendental manera esun aki, ta ser trata den pura. E tabata haya cu esaki ta un muestra di dependencia di parlamento di gobierno. Un pregunta interesante cu el a trece dilanti tabata kico ta bay pasa, si un dado momento no keda cla cu e suministro di gas via e tuberia cu mester yega Aruba. Na e momento ey ta para e proyecto, o ta permiti e upgrader cuminsa traha toch riba fuel oil, cu tur su consecuencianan pa medio ambiente den San Nicolas, tabata su pregunta, cu lo mester haya contesta di e ministro ainda.
Chris Romero di fraccion MEP tambe a pone atencion riba e punto cu e vision di e gobierno actual pa bay green no ta cuadra cu e reapertura di refineria. Y cu awor pa scapa cara nan ta yam’e awor un ‘green refinery’.
E debate a cuminsa cu un introduccion bastante extenso di minister Mike de Meza encarga cu e proyecto di Citgo, Banda di eulogio di banda di fraccion gubernamental pa tur e trabao haci pa logra e acuerdonan, tabatin bastante indignacion ainda di banda di oposicion pa e manera con no a duna copia di e documentonan y no a duna suficiente tempo pa preparacion pa e tratamento. Entre e mocionnan cu a bin dilanti ta entre otro e mocion di Glenbert Croes pa somete cambio di e propiedad di e compania di distribucion cu a keda resorta bao di e compania Refineria di Aruba NV, na un mayoria di dos tercera parti di parlamento. Esaki pa evita cu benta cu un tercer parti lo sucede na forma no bon pensa.
Di diferente orador a bin preocupacion pa loke ta e garantianan cu tin hinca den e acuerdonan, manera Raad van Advies tambe a señala.
Di banda di fraccion di PDR tabatin un atake fuerte tambe riba gobierno pa e manera di sconde documento pa oposicion mientras otronan manera Conseho Consultivo (Raad van Advies) si ta haya nan pa por haci nan trabao. Lider di MEP tambe a sigui riba esaki indicando atrobe cu el a haya e contractonan via un otro caminda y tambe a critica cu e contractonan no ta stipula niun confidencialidad.
Lider di fraccion di AVP a enfatisa atrobe e importancia economico y tambe a recorda e consecuencianan negativo ora Valero a cera na 2009 bou di gobernacion di MEP. Y kico e reapertura awor ta nifica, specialmente pa empleo cu lo baha bou di 5%.
Continuacion manera bisa ta awe mainta.
