Aruba ta un isla reconoci mundialmente pa su desaroyo turistico, pa via di e beachnan cu santo blanco y e variedad di hotelnan cu ta ofrece un estadia di placer pa tur e turistanan.
Na e momentonan aki, e isla ta e protagonista di hopi construccion di hotelnan, cu te ainda e comunidad no sa si esey lo bay trece beneficionan economico, empleonan pa stranhero, como tambe e aumento di calidad di bida di e poblacion.
Tambe e companianan mester ta consciente di e impacto ambiental cu e construccion descontrola di hotelnan ta trece, e plannan di desaroyo turistico di e companianan mester ta prepara y capacita pa cumpli cu e necesidad di e proyecto cu nan ta haci.
Debi na e caracteristicanan di hopi actividadnan turistico, e demanda lo por surpasa e capacidad di e servicionan publico y infrastructura, e recursonan natural como reef di coral y mangel lo por sufri trastorno cu un desaroyo turistico modera.
E impacto negativo ta cu por causa e destruccion di e reef pa haci material di construccion, ta destrui e espacio di tera humedo y otro habitat of sitio di importancia cultural, arkeologico of historico. Ademas, tin posibilidad cu awa lo wordo contamina, pa via di un eliminacion di awa inapropia, of pa desecho toxico.
Aruba ta na espera cu e inversionnan aki lo por ta faborabel pa turismo y asina lo por genera rikesa, pa aumenta e nivel di bida di su comunidad. Mientras, otro grupo di ciudadano ta mira cu hopi desconfiansa con nos isla ta yena cu construccion, lagando tiki espacio pa naturalesa.
