(NLTimes) – FIOD a aresta un hende homber di 41 aña di Etten-Leur siman pasa bao sospecha cu el a viola e sancionnan contra Rusia. Segun e departamento di investigacion di impuesto, e homber a sigui exporta chipnan di computer pa Rusia apesar di e sancionnan cu ta prohibi esaki.
FIOD a lansa un investigacion contra e homber aki y su compania basa na Moerdijk a base di informacion for di aduana. E homber en cuestion su compania ta exporta partinan di computer, mas tanto na Rusia. Den februari di aña pasa, e Union Europeo a implementa sancion contra Rusia a causa di su inasion na Ucrania, prohibiendo e benta di chipnan di computer y otro cosnan na e pais.
Segun FIOD, e homber su exportacionnan na Rusia a disminui dramaticamente despues cu e sancionnan a drenta den efecto. “Sinembargo exprotacion na paisnan alternativo manera Kazakhstan, Kyrgyzstan, Mongolia, Uzbekistan, Turkia y United Arab Emirates a aumenta drasticamente,” FIOD a bisa. “E ekipo di investigacion ta sospecha cu el a exporta e productonan via e paisnan alternativo, cual despues ta para na Rusia.”
FIOD a aresta e homber riba dia 11 di juli, y e magistrado a mantene su persona bao custodia pa 14 dia riba diabierna. E investigadornan a confisca productonan fisico, digital y den warehouse for di e homber su cas y su compania.
