E bendedonan di souvenir y artesania situa temporalmente patras di edificio bieu di DOW ta mira cu e kiosconan nobo dilanti di terminal di crucero a bin cla varios luna pasa. Pero te ainda nan no a wordo aloca eyden.

Nan preocupacion ta cu despues cu nan a lucha pa gobierno bin cu e proyecto di kiosconan den e plasa nobo conoci como Welcome Plaza, tin rumor persistente cu otro hendenan lo haci uzo di e localidadnan aki y no nan.

Nan ta alrededor di 19 hende cu nan kiosco cu for di 2001 nan ta bendiendo souvenir den e area aki. Mientras cu alrededor di 40 kiosco nobo a wordo construi cu e promesa di re aloca nan.

Preocupacion
Bon Dia Aruba a bay papia cu nan kendenan den un solo bos a expresa no solamente nan preocupacion, sino nan mal contento ya cu te ainda nan no a wordo aloca ni atendi. Nan a bati porta di minister y demas departamento concerni, entre nan DOW y DIP, y nada cu nan ta haya contesta, nan ta bisa. Nan ta mira cu eleccion ta yegando y ainda nan ta den incertidumbre con lo para cu nan. “E no ta husto cu nos a sacrifica. Mientras cu tin papia cu otro hendenan ta bringa pa haya e luga eynan.”

Dos aña pasa un comision di artesano a wordo lanta y aparentemente nan ambicion ta di por haya e kiosconan aki. Mientras cu e bendedonan di souvenir ta argumenta cu for di inicio di e proyecto di embeyecemento di e area aki, nan a wordo priminti cu nan ta esunnan cu lo move eynan prome mientras cu e localidad cu ta resta ta bay pa otro hendenan. Nan no sa kendenan e hendenan ta ainda.

“Mientras ta nos esunnan cu a presiona pa nan bin cu e construccion aki.”

Exodo
E bendedonan ta bisa cu nan a wordo muda varios biaha durante e ultimo 10 añanan. E ultimo mudamento a sosode como cuater aña pasa caminda nan a wordo ubica banda di e terminal di Arubus na Playa cu e promesa cu esaki lo ta e ultimo biaha. Pasobra gobierno lo embeyece e parti unda nan tabata prome, manera a sosode caba.

E bendedonan aki ta biba un exodo pa varios aña y nan ta manera hendenan sin tera. Na cuminsamento nan a wordo ubica den e parkeerplaats patras di Aruba Trading cu tabata un temporada teribel pa nan. Despues nan tabata banda di e muraya di edificio bieu di DOW. Awor nan ta wardado casi 5 aña den e sitio actual caminda nan mester soporta tur cos, biento, santo, solo, yobida. Tur esaki cu e unico speransa cu nan lo wordo ubica den un sitio mas nechi, mas digno y humano.

“Aworaki nos ta muriendo di calor, ya cu nos ta den temporada di calor pisa y nos no tin niun fan pasobra no tin coriente”. Tampoco no tin WC den caso di un urgencia, ni awa, etc., pues nan ta pasando den hard time pa hopi aña, segun nan ta splica. Tambe nan ta mirando cu e temporada di yobida a drenta caba y ora awa ta cay e area aki ta bira teribel. Nan a confronta perdida ya cu tin biaha e awa ta cay asina duro cu nan mercancia ta daña.

“Nos ta want’e pa motibo cu nos a wordo priminti cu lo bay eyden” nan a vocifera. Pero for di unda nan ta situa nan por mira cu e kiosconan nobo tin lunanan cla y nan no ta hayando niun contesta ki tempo nan por move.

Negligencia
Nan a purba di comunica cu minister di Infrastructura, Benny Servinger, pero nan ta keha cu nunca no ta haya niun contesta di parti di e mandatario y niun hende di su ministerio ta yama nan bek.

Nan kier probecha e luna aki cu ta basta slow pa cuminsa move y asina cuminsa traha riba nan kiosco nobo. Nan kier embeyece nan pa nan ta mas agradabel pa nos turistanan y hendenan local. Mayoria di nan esaki ta nan unico entrada of fuente di trabou y nan kier un miho futuro, asina nan a bisa.

Nan mester soporta hopi sushedad y mal holo, ya cu no tin baño disponibel pa nan, ni pa e turistanan. Ademas nan ta haya cu e area no ta e miho bista pa ricibi e turistanan crucero. Tin turista den rolstoel cu lo desea di cumpra nan souvenir, pero nan no por tin acceso. Mientras cu di otro banda e kiosconan nobo a wordo lanta den un area cu a wordo embeyece, danki na nan lucha y perseverancia.

Supuestamente e instancianan di gobierno ta trahando riba reglamento y contract. Nan ta haya exagera cu nan mester tarda tanto luna asina, sino no tin otro cos ta cushinando su tras segun nan.

For di cuminsamento cu nan a drenta den e actividad aki nan tabata cay bou departamento di Santa Rosa. Despues e situacion a cambia y awor nan mester atende cu ministerio di Infrastructura y Cultura. Pero mirando e situacion actual cu niun hende ta atende cu nan, pues nan no sa cu kende nan por papia. “Niun ta scucha nos. Nan no ta duna sikiera un contesta of sikiera papia cu nos.”

Bon Dia lo busca un reaccion di gobierno riba e situacion aki.