Consumo di alcohol y droga bou nos hobennan ta keda un tema di atencion y preocupacion pa FADA. Diferente instancia ta join cu nan pa e proyecto di carrousel di informacion. Nan ta ripara cu e bendedonan ta uza tactica, hasta marketing, pa convence hoben pa purba droga.

FADA conhuntamente cu otro fundacion manera Wet Gele Kruis (WGK) y Telefon pa Hubentud (TpH), y departamento di duana lo duna tur informacion riba specialmente consumo di alcohol pa tur hoben di scol secundario en conexion cu temporada di Carnaval 64.

Monique Giel-Labad di WGK ta haya hopi importante cu mayornan pone mas atencion riba nan yiunan, ‘sigur si nos por mira cu muchanan menor cu 15 aña tabata nan so riba caya’. Durante su practica e tambe ta haya cu e muchanan ta cuminsa cu marihuana pasobra nan a wordo ofreci esaki gratis. Nan ta purb’e y uz’e, despues di cuater biaha ora cu nan curpa ta custumbra cu marihuana, nan tin cu cumpr’e. E ta mira cu esaki ta un motibo cu e hobennan ta cay den e circuito di criminalidad ya cu e tin cu horta pa asina busca fondo pa e por cumpra marihuana.

E ta haci un yamada na e mayornan pa nan bira consciente cu un mucha no por ta su so riba caya pasobra nan por bira un victima di esun cu ta ofrece y bende e tipo di droga aki. Ya cu e muchanan tin biaha ta insisti pa bay nan so carnaval, y tin biaha e mayor ta cumpli cu nan deseo. Sin sa e consecuencia cu esaki por tin y e problema cu unabes cu nan ta cay den droga, ta bira hopi dificil pa un mucha por sali fei dje. Ya caba den e Parada di Fakkel tabatin hopi hoben bou di influencia di alcohol.

Awor e instancianan ta bishitando dos pa tres scol pa siman durante carnaval pa sigui duna e informacion necesario. Pero tambe nan ta duna informacion riba marihuana durante otro temporada di aña.

Mirando cu consumo di marihuana y te hasta promocion pa legalisa su uzo ta un asunto cu ta wordo debati den nos comunidad, Rulienne Arends di FADA a laga sa cu nan tin full un otro sistema pa atende cu e asunto aki. Nan ta bin cu otro tipo di charla cu nan ta duna den scol pa tur hoben y mayornan tambe cu ta desea e tipo di informacion aki.

Pero den su proyecto di carrousel di informacion nan ta pone mas atencion riba consumo di alcohol cu ta keda un problema. Sra. Arends ta haya cu e compromiso pa duna informacion debido mester wordo carga pa cada mayor y educador, grupo di carnaval y di amigo pa nos hobennan sa e consecuencia di abuso di alcohol.

Un factor cu ta sigui hunga un rol bou nos hobennan ta e presion di nan grupo di amigonan. E ta haya cu ta un proceso largo pa sigui conscientisa nos hobennan riba abuso di consumo di alcohol. Durante cuater aña cu nan ta bin realisando e proyecto di carrousel di informacion. Aunke e ta bay poco poco pero tur cos ta cuminsa cana. Nan ta evaluando pa organisa e carrousel di informacion no solamente den carnaval sino den otro temporada di aña. “Nos ta spera cu poco poco nos por mira cambio.”

Competi cu bendedonan di alcohol
Shurman Milliard di Telefon pa Hubentud a indica cu un grupo di 24 persona, mayoria di nan hende jong, a keda deteni durante e Parada di Fakkel pa problema ocasion pa abuso di consumo di alcohol. Pero si nan no a bin duna informacion riba e asunto aki, por ta e cifra tabata mas grandi, e ta bisa.

P’esey e ta considera relevante pa sigui lucha contra e compania cu ta produci y promove consumo di alcohol cu tin hopi mas placa y ganashi pa medio di carnaval. Nan como fundacion y instancia di prevencion y conscientisacion tin cu competi cu nan. “Nos ta haci nos best tur aña pa competi contra di nan.” A pesar cu e cifra di persona deteni ta uno mas grandi cu aña pasa, e ta haya cu si nan fundacion no sigui traha pa informa riba consecuencia di alcohol y droga cerca nos hobennan, y muy specialmente durante temporada di carnaval, e cifra por bira mas halto ainda.