Dia 1 di januari ultimo a drenta na vigor e ley cu ta prohibi e uzo di saco di plastic. E implementacion di e ley aki ta bayendo bon di parti di supermercadonan y otro establecimento comercial. Sinembargo e sector di benta di cuminda, specialmente rstaurantnan, ainda no ta cumpliendo cabalmente cu e ley aki.
Minister di Husticia Arthur Dowers a recorda tur esunnan cu no ta cumpliendo cu e ley aki cu e uzo di saco di plastic no reuzabel a bira prohibi na Aruba, y nan ta coriendo un riesgo di haya un boet pisa.
Implementacion ley
E ta haci un apelacion na tur esunnan cu no a tene cuenta cu e ley aki, pasobra e ta ripara cu hopi bes cu tin cambio di ley, tin hendenan cu ta tene nan mes na ley y otronan no tanto. E mandatario a bisa cu satisfaccion cu el a bay diferente establecimento comercial caminda bo mester bay cu bo propio saco pa haci compra.
Pero tambe el a yega di constata sitionan cu ta bende cuminda cu mester refleha nan mes cu nan mester cumpli cu nos ley. Minister Dowers a abstene di menciona e nomber di e restaurant (nan), pero el a indica cu nan ta core un riesgo di haya un boet di casi 10 mil florin of mas, si nan ta sigui viola e ley di prohibicion di uzo di saco di plastic. “No tin ningun rason pa bo sigui haci esey. Si bo ta bende pastechi, si bo ta bende galiña, si bo ta bende porkchop, kico cu bo ta bende cuminda den tienda, bo ta uza sea saco di papel of tur hende mester bin cu su saco reuzabel.”
Control
E mandatario a haci un apelacion pa tur hende bira consciente pa elimina e uzo di saco di plastic, pasobra e ta atenta contra medio ambiente. Igualmente e conscientisacion aki ta yuda pa evita e uzo di extra polis pa reenforsa e ley aki y bay controla; ya cu e mester di nan pa realisa diferente trabou, entre nan reduci e risico cu tin riba criminalidad.
