Ayera tardi den Corte di Prome Instancia a trata e caso di S. De Castro, ken ta acusa di malversacion na pia di trabao, estafa y falsificacion den e periodo entre aña 2016 te mei di aña 2023.
Dia 30 di mei, Afpakteam Aruba den cooperacion estrecho cu Polis y Ministerio Publico a tene un accion den Caya Frère Johannes caminda a detene e sospechoso S.d.C pa un caso relaciona cu malversacion y estafa. Den juni, a tuma e decision di prolonga S.d.C su detencion na Korrektie Instituut Aruba (KIA) a causa di e sospecha cu su persona a malversa un suma di 2,4 miyon florin, ricibi for di clientenan cu a paga pa entrega na belastingsdienst pa motibo cu S.d.C tabata fungi como belastingadviseur.
E caso aki a haya basta atencion riba rednan social y varios persona a cuminsa comparti nan testimonio, unda cu varios a sigura cu e sospechoso a estafa nan cu sumanan di placa sin cu e por a cumpli e trabao cu el a priminti di haci di belasting. Durante un huiszoeking a tuma den beslag placa den cash, joyas, administracion y computernan.
E caso aki ayera atardi tabata den Corte di Prome Instancia, unda cu e punto central cu abogado di S.d.C a trata tabata cu e sospechoso tin mester di mas tempo pa prepara su defensa. Anteriormente a kere cu ta trata un suma di 2,4 miyon florin, sinembargo despues di a papia cu 22 victima, a resulta cu e suma ta di 3.2 miyon florin.
Un di e argumentonan principal cu e abogado di e sospechoso a trece dilanti, ta cu mientras deteni na KIA, e sospechoso a haci peticion pa ricibi documento; sinembargo e no a haya esaki. Pa e motibo aki, segun e abogado, e sospechoso no a haya e oportunidad di revisa esakinan. Na comienso di e audiencia, a informa cu te ainda e proces verbaal no ta cla, pero si cu esaki lo ta cla den mas o menos 3 siman. E proces verbaal aki lo tin tur e documentonan necesario pa tanto e sospechoso y e abogado por ta completamente informa y tin tur documento den nan man pa prepara pa dia 1 di december, cual tabata stipula como e dia unda lo cuminsa cu e caso.
Sinembargo, e abogado a argumenta cu esaki no ta laga cu suficiente tempo pa por prepara e defensa. Segun e abogado a expresa, e sospechoso tin mester di mas tempo pa por haci trabao administrativo y loke por a compronde, revisa su documentonan bon.
Pa motibo aki, abogado di e sospechoso a pidi pa cambia e fecha di 1 di december, pa asina e sospechoso por ricibi mas tempo pa e por prepara su defensa adecuadamente. Mirando cu si ta haya e proces verbaal den 3 siman, esaki ta nifica cu nan lo tin solamente october y november pa prepara e defensa, cual segun e abogado no ta suficiente tempo.
Na fin di e audiencia, a yega na e decision cu lo concede e peticion di e sospechoso y lo stipula un fecha nobo pa trata e caso aki den Corte. E caso a keda suspendi indefinidamente.
