Tabata dia 30 di mei ora diferente medio di comunicacion a publica e noticia di e detencion di un persona cu tabata fungi como belastingadviseur, di inicialnan S.d.C. Varios ciudadano a acusa su persona di estafa y te ainda e ta continua deteni na KIA.
Ayera diamars, Ministerio Publico mediante su vocero, a duna Bon Dia Aruba un update tocante e caso cu a cuminsa dia 30 di mei ultimo, na momento cu Afpakteam Aruba den cooperacion estrecho cu Polis y Ministerio Publico a tene un accion den Caya Frère Johannes, caminda a detene un sospechoso relaciona cu un investigacion di malversacion y estafa.
Dia 14 di juni ultimo a prolonga e detencion S.d.C., ken ta continua deteni na Korrektie Instituut Aruba (KIA) na e momentonan aki y tin e sospecho cu el a malversa sumanan di placa di mas cu 2,4 miyon florin cu el a ricibi di clientenan pa entrega na belastingdienst; S.d.C tabata traha como belastingadviseur.
Durante e huiszoeking a tuma placa cash, joyas, administracion y computernan den beslag. E investigacion no ta cla ainda. Ayera dialuna, OM a informa cu e sospechoso aki ta den detencion, y cu e ta na KIA mientras cu e investigacion ta andando.
E caso aki a haya basta atencion riba rednan social na unda usuarionan di Facebook a publica nan testimonio sigurando cu e persona en cuestion a estafa nan cu sumanan di placa sin cu e por cumpli cu e trabao cu a priminti pa haci di belasting.
Afpakteam ta consisti di Ministerio Publico, Polis, Ademas, Fiot (Fiscale inlichtingen- en opsporingsteam (F.i.o.t.) di Departamento di Impuesto (DIMP), FIOD (Fiscale Inlichtingen- en Opsporingsdienst), Marechaussee (KMar), Kustwacht Steunpunt Aruba, Meldpunt Ongebruikelijke Transacties (Meldpunt) y RST y ta traha na bringa criminalidad financiero economico. Por acerca Afpakteam cu señalnan di labamento di placa via mail: afpakteam@kparuba.com of via tiplijn: 11141
