(AP)—Belarus a lansa ehercicionan nuclear ayera envolviendo misil- y avionnan di guera capaz di carga armanan nuclear tactico, cual aliado cercano Rusia a desplega eynan entre tensionnan cu e West tocante Ucrania.
E maniobranan Belaruso a cuminsa un dia despues cu Rusia a anuncia plan pa tene ehercicionan similar simulando e uso di armanan nuclear den loke el a pone como un respuesta na declaracionnan pa oficialnan den West señalando posiblemente mas envolvimento den e guera na Ucrania. E tabata e prome biaha cu un ehercicio asina a ser anuncia publicamente pa Moscu.
E minister di Defensa Belaruso Viktor Khrenin a bisa cu un unidad di misilnan Iskander y un escuadron di fighter jetnan Su-25 lo tuma parti den e ehercicionan.
E maniobranan, organisado conhuntamente cu Rusia, a cuminsa mientras presidente Ruso Vladimir Putin a ser inaugura pa su di cinco termino ayera, primintiendo pa sigura e seguridad di Rusia. Aña pasa, Rusia a move algun di su armanan nuclear tactico pa Belarus, cual tambe ta comparti frontera cu Ucrania y miembronan di NATO Polonia, Latviia y Lithuania. E presidente autoritario di e pais, Alexander Lukashenko, a depende riba relacionnan cercano cu Rusia y a provee su pais como un plataforma di escena pa e guera den Ucrania.
Moscu a enfatisa cu e armanan nuclear tactico desplega pa Belarus ta keda bao control militar Ruso. Al contrario cu e misilnan balistico intercontinental cu por destrui henter ciudadnan, armanan nuclear tactico diseña pa usa contra tropanan riba tereno di bataya ta menos poderoso. Armanan asina ta inclui bomnan aereo, warheads pa misilnan di distancia cortico y municion di artileria.
E despliegue di armanan nuclear tactico pa Belarus, cual tin un frontera 1,084 kilometer largo cu Ucrania, lo permiti aeronave- y misilnan Ruso pa yega posibel obhetivonan eynan mas facil y mas lihe si Moscu dicidi pa usa nan. Tambe e ta extende e capacidad di Rusia pa tin un marca riba aliadonan di NATO den Europa.
Ambos Putin y Lukashenko a bisa cu e despliegue di armanan nuclear Ruso pa Belarus tabata diseña pa usa contra menasanan for di e West. Lukashenko a describi e ehercicionan como “defensivamente exclusivo,” argumentando cu e armanan nuclear Ruso ta diseña pa deriba cualkier agresion contra Belarus. “Esaki ta un arma di impedimento, un arma defensivo,” Lukashenko a bisa.
E lider Belaruso a bisa cu e ehercicionan lo envolve e entrega di armanan nuclear tactico for di deposito na unidadnan militar unda nan lo ser poni riba misilnan y pega na avionnan di guera. E unidadnan di misil lo practica despliegue scondi pa posicionnan di atake pa asina simula un respuesta riba un atake riba Belarus, el a bisa.
E lider di oposicion na Belarus, Sviatlana Tsikhanouskaya, ken tabata forsa di bandona e pais bao presion oficial despues di desafia Lukashenko den un voto presidencial den augustus 2020, a reuni ayera cu Secretaria General di NATO Jens Stoltenberg y a denuncia e presencia di arma nuclear den Belarus.
“Arma nuclear ta pone Belarus y Bularusonan bira obhetivonan,” el a bisa. “E armanna nuclear Ruso den Belarus ta un menasa directo na bida y salud di ciudadanonan den henter Europa.”
