Di un of otro manera, mas cu 90% di poblacion mundial ta consumi cafeina tur dia y Aruba no ta un excepcion.

Di acuerdo cu cientificonan di Food and Drug Administraton FDA, cafeina ta wordo uza manera un droga pa tratamento di cansancio, letargo y mareo y tambe ta wordo uza manera un aditivo den cumindanan. E ta yuda mantene e hende lanta y alerta pa algun tempo despues di a wordo bebe. Pero di otro banda su efectonan negativo por dura mas largo cu su efectonan positivo y ora ta papia di efectonan negativo ta inclui insomnio, hende ta perde likido, ansiedad, dolor di stoma, nervio, batimento lihe di curason y ta subi e presion di sanger.

Fuente nan conoci y no conoci di cafeina

Tin fuente natural di cafeina manera e koffie mes, blachinan di te productonan cu cola y cocoa etc. Sin embargo tin productonan cu ta contene cafeina y cu nos no sa manera ijscream, productonan pa fresca e aliento, te friu. Si a bo ta un persona na estado of un pashent di curason of simplemente un persona cu ta adicto na cafeina cu ta purba di kita for di dje, ta bon pa tin conocemento riba e productonan cu ta contene e substancia aki.

Pero cuanto cafeina por tin den un mint pa haci aliento fresco? Di un otro manera sin cu nos a ripara, mint of cualkier otro cos pa fresca e aliento a bira poco poco parti di nos bida diario, pero nos no mester ta na haltura cu e pildo di mint aki tin 100 mg di cafeina, esta e mesun cantidad cu un cup di koffie.

Di otro banda e bonchi di cocoa, cu ta e ingrediente principal di chuculati ta un fuente natural di cafeina. E cantidad di cafeina den un chuculati ta depende di cuanto cocoa a wordo usa, di tur manera e chuculati scur tin mas cafeina cu esun cla.

Un scoop di ijscream di koffie por contene mas cafeina cu un bleki soda of un bleki red bull.

E bebidanan energetico ta aumenta e nivel di energia y ta haci e persona mas alerta. Esaki ta pasobra e sorto di bebidanan aki ta contene cafeina, tin algun di nan cu por contene hasta 100 mg, esta mesun cantidad cu un cup di koffie preto.

Cafeina ta un medicamento, ora e ta wordo consumi den forma di pildo, den cantidad apropia y via un receta di dokter. Pildo a base di cafeina ta wordo uza contra dolor di cabes. Sin embargo e bebemento excesivo di esaki por hiba e persona na un sobre dosis cual por caba den un problema serio di salud.

Relacion entre Asma y Cafeina

E relacion aki ta un debate hopi cayente den e ciencia medico. Tanten cu tin algun estudio cu ta bisa cu efecto di e cafeina no ta beneficioso pa maneho di asma, algun investigacionnan a mustra otro cos. Algun cientifico a propone cu e uzo di cafeina por yuda persona cu problema respiratorio, ya cu cafeina tin algun propiedad manera e teofilina cu ta un substancia pa habri e pulmon y ta relaha e buraco di bronchio loke ta haci e halamento di rosea mas facil y di e manera aki ta yuda hopi cu e asma. Sin embargo e debate ta sigui riba mesa.

E cafeina ta malo pa bo?

Sea un cup di cappuccino, un espresso, un mocha… e cafeina ta presente den tur. Pero kico ta haci nos asina debil dilanti di e holo di un koffie cu ta hipnotisa nos sinti? No ta solamente algo psicologico, pero fisico.

E cafeina den un cup di koffie ta stimula e sistema nervioso central haciendo e mente alerta y dunando un shot di energia, E substancia ta hunga wega cu nos mente laga nos sinti bon cu nos mes y cu ambiente cu ta rondona nos. E ta hisa e batimento di curason y e metabolismo y por los bo barica un tiki. Tambe tin un efecto diuretico, esta e orina ta bira mas frecuente.

Bebemento di 200 pa 300 milligram di cafeina, esta dos pa tres cup pa dia no ta haci malo pa mayoria di hende. Pero si bo ta bebe mas cu esaki eventualmente bo lo por cuminsa experencia algun sintoma manera nervio, sensacion di cansancio, bira rabia facil, haya gana di saca, perdemento di soño y dolor di cabes. Pa conclui nos por bisa anto cu mescos cu tur cos den bida, exceso no ta bon.