Tormenta tropical Beatriz a degrada te un depresion tropical y ta continua su avance te noroeste di Mexico, pasando como tormenta hopi fuerte na Puebla, Oaxaca, Veracruz y Tabasco, segun cu Sistema meteorologico Nacional di Mexico a informa.
E organismo a detaya den un boletin cu tormenta Beatriz ta na 10 kilometer na sur suroeste di San Juan del Rio na Oaxaca, y ta desplasa pa nor noreste cu un velocidad di 11 kilometer pa ora. Durante e dia di ayera, Beatriz a genera biento di 55 kilometer pa ora, cu rafaga di 75 kilometer pa ora. “E lo debilita den sur y sureste di Mexico, cu tendencia pa sali pa awa di golfo di Mexico.
E servicio meteorologico ta anticipa un tormenta fuerte cu awacero di mas cu 250 millimeter na Puebla, Oaxaca, Veracruz y Tabasco, y tormenta intenso di 75 pa 150 mm) na Chiapas y Campeche, y yobida hopi fuerte na Tlaxcala y Yucatán.
Beatriz lo genera olanan halto di 2 pa 2.5 meter na costa di Guerrero y Oaxaca, cu lo disminui poco poco. E institucion a conseha na henter poblacion pa tuma precaucion na e estadonan menciona pa presencia di awacero, biento y olanan, como tambe nabegacion riba lama. Tambe cu pueblo mester tuma na cuenta tur recomendacion cu a ser publica pa sistema nacional di proteccion civil na cada region Mexicano.
Gobierno di Mexico ta anticipa cu pa 2017 lo yega na Mexico entre 3 y 5 ciclon tropical, di un total di 27 cu ta origina den awa di Pacifico y Atlantico, den un temporada atipico cu a cuminsa tempran y por ta relaciona cu fenomeno di El Niño.
