Conseho di minister a aproba un par di plannan relaciona cu edificionan bieu den y cerca centro di nos capital ayera. Nan a dicidi cu lo no construi un hotel sea condominio na luga di ex Bushiri hotel, pero ta desaroya un beach pa publico por uza.
E otro proyecto ta trata di e e edificio di ex DOW na LG Smith Boulevard (otro banda di waf) unda cu e ministernan a dicidi cu Aruba Tourism Authority tin e opcion pa cumpra y asina haci nan cede. Despues su independisacion ATA a muda na e edificio actual cu na prome instante mester a fungi como Bestuurskantoor. Pero despues cambio di gobernacion esaki a cambia.
Ex scol JFK
Segun gobierno awor tambe lo cuminsa por lo pronto cu e renobacion di e ‘ruinanan’ John F. Kennedy, un plan cu a keda riba mesa pa hopi tempo. Awor gobierno a dicidi di bende e scol bieu aki na e banco AIB na un balor di 5.7 miyon florin. “Despues cu e destaho publico ta sali e luna aki, ta premira cu den april/mei ya caba e proyecto di restauracion ta canando. Un bes completa, gobierno ta huur e edificio na un prijs igual na loke ta paga actualmente pa huur otro edificio, loke ta nifica cu no ta bin gasto acerca, pero si ta rescata un monumento. Manera anuncia anteriormente, e espacionan renoba lo bira sede pa tur departamento di Enseñansa”, asina gobierno ta bisa den su relato.
